Nongpoh, Nailur 02 : Ka Joint Action Committee jong ka Shnong Umsaw Nongbri, hynne ka sngi Nyngkong, kala dawa ia ka kompani Bharat Sanchar Nigam Limited (BSNL) ba kan weng noh mardor ia u mobile tower bala shu iehshrah da ki bun tyli ki snem ha Umsaw Nongbri, Ri-Bhoi District.
Ka Joint Action Committee (JAC) ba kynthup ia ka Dorbar Shnong, ka Seng Samla bad Seng Longkmie, kala pynrem jur ruh ia ka kompani kaba la sngap mynthi ia ka jingkyrpad jong ka Dorbar Shnong, kaba la buh hakhmat ka kompani da ki snem mynta namar ka jingiohi ia ka jingma kaba ap ia ki nongshongshnong lada khyllem une u tower khamtam ha ka por jur lyer.
U Rangbah Shnong Bah Dramshon Mawohniang ula pyntip ba ka BSNL kala pynieng ia une u tower naduh u snem 2007 hynrei tang hadien katto katne snem, ka kompani ka khlem phah briew shuh ban sumar ia une u tower, peit ia ki tiar ki tar ban pynthikna ia ka jingskhem u tower. U ong ka kompani kala shu iehshrah la bun snem haduh ba u tower ula kem sarang bad buh jingma ia ki paidbah.
Ula pyntip ba ki nar jong une u tower kila bam sarang lut bad ka kam ba haba don ka jingjur lyer ne khie eriong, kine ki nar ba bam sarang ki ju hap sha madan, kaba pyni ia ka jingbym skhem shuh une u tower.
U President ka Seng Samla Mission Tron, uba dei ruh u Chairman ka JAC, ula dawa mardor na ki bor ka BSNL ba kin wan mih noh marmar sha katei ka shnong ban shimkhia ha kaban weng noh ia u ne u tower na katei ka shnong bad lada ha kane ka kynti ruh ki bor ka BSNL ki iai kuman bad mynthi, ka JAC kam banse ban shim pat da ki lad ki lynti kiba tyngeh.
