Shillong, Naitung 11: Ki Nongialam ka Bharatiya Janata Party (BJP) Meghalaya haka jingialam u State President u Rikman G Momin, u Myntri Sorkar Jylla u Bah AL Hek bad u Nongaiktien ka Party u Bah Mariahom Kharkrang kila kynduh iaki ophisar North Eastern Institute of Ayurveda & Homoeopathy (NEIAH) ban iakren halor ki mat bapher bapher kiba ktah iaka bha ka miat ki samla pule.
Ka jingiakynduh kadei ban pynsngew ka jingsngewkhia halor ka jingduna ki nonghikai khamtam ki nonghikai bala shah thungkam pura.
Ka kynhun jong ka Meghalaya BJP kala dawa naki bor pyniaid ka NEIAH ban pyndap iaki kam ba thylli hapoh kane ka jaka pule.
Naka liang u Director ka NEIAH u la pyntip iaka kynhun BJP Meghalaya ba iaka mynta ka dang iaid ka Interview ban thungkam Contract bad ki don ruh ki kyrtong kiba la shah jied (Shortlisted).
U Director ula kular iaka kynhun ka shen ka NEIAH kan sa thungkam pura hadien bala ioh jingmynjur ka ban shimpor sa kumba shi bnai.
Naka liang ka Meghalaya BJP khamtam u Myntri Sorkar u Bah AL Hek u la kular ban buddien halor kane ka mat bad ka Ministry ka Sorkar Pdeng.
Ka BJP Meghalaya ka kular ruh iaki Ophisar ka NEIAH ban ai ka jingkyrshan khnang ban pynthikna ba ka jaka pule ka iaid beit iaid ryntih naka bynta ka jingmyntoi ki samla pule bad ka Jylla baroh kawei.
