Rimrangpara, Risaw 22 : U Myntri Rangbah ka Jylla Conrad K Sangma ha ka sngi Palei, ula pyntip ba ka Sorkar Jylla kala pynlut haduh T.20,000 man la u snem ha kaba pyntreikam ia ki lad jingiarap bad kam pynroi bapher bapher ha Jylla bad na kane, T.4000 klur la pynlut tang sha ki kam pule puthi.
U Myntri Rangbah ula pyntip ia kane haba plie ia ka building ba dang shu dep shna pynbha jong ka Ringrangpara Higher Secondary School, South West Garo Hills ha ka jingiadonlang ka kurim bad MLA ka Gambegre Dr Mehtab Chandee A Sangma bad u MLA ka Chokpot Sengchim Sangma.
Haba ai jingkren, u Myntri Rangbah ula ong ba ka pule puthi ka dei ka kam kaba la buh hakhmat eh da ka Sorkar Jylla.
“Man u snem ngi pynlut T.20,000 klur sha ki lad jingiarap bad kam pynroi bapher bapher ha Jylla, bad na kane, T.4,000 klur ka dei sha ka pule puthi marwei, namar ka pule puthi ka dei kaba kongsam tam” ula ong.
U iathuh ba ka Sorkar kala leh mynta ia ki kam ban pynkylla nadong hadong ia ka rukom treikam ha ka kam pule puthi wat hapdeng kiba bun ki jingeh-ka jingdon bun jait ki skul, ki jingeh ha ki jingtei, ka jingeh ha ka tulop ki nonghikai, ki iingskul kiba la sniew bad ka result SSLC kaba sniew ha ki snem bala leit noh.
“Ha ki snem bala leit, palat 75% ki khynnah kim pass ia ka eksam SSLC ha ri-lum Garo. Ki skul Sorkar ki hap treikam na ki jingtei kiba jot. Wat hapdeng ki jingeh, ha ki phra snem bala leit, ka Sorkar ba ialam da ka NPP kala trei khlem shongthait ban shakri ia ki paidbah bad pynjanai ia ka kam pule dangle” ula ong.
U Myntri Rangbah ula ong ba hapoh ka Mission Education, ka jingthmu ka long kaba suk :
man ki skul ka Sorkar ha Meghalaya kin kot sha ka kyrdan kaba rit tam ba la buh, ha kaba ïadei bad ki kamra klas, ki jingdonkam bad ki jingtei, bad kiwei pat ki jingdonkam ba kongsan.
“Haba ngi peit ia ki skul jong ngi ha ki katto katne snem bala leit, ngi shem ba bun kila treikam da ki phew snem na ki jingtei kiba la jot, ki bym shngain lane kiba shipor. Ym don ki khynnah ki ban ioh iaka jinghikai kaba biang na ki kamra klas kiba pei um haba slap lane ki bym don jaka ban shong. Haduh mynta, palat 2000 tylli ki skul ha kylleng ka Jylla lah dep ban kyntiew kyrdan. Tang ha u bnai bala lah, ha ka 23 tarik Nailur, palat 80 tylli ki iingskul la plie tang ha ka shisngi” ula ong.
Halor ka jingpynbha ia ka result SSLC, ula ong “Mynta u snem haduh 86.84% ki khynnah kila pass ia ka eksam SSLC. Ha ka Higher Secondary, ka jingpass kala kot 83% ha ka science, arts bad commerce. Bad ha ka National Performance Grading Index for school education, ka Meghalaya kala kiew na ka 448 ha u 2024 sha ka 525.71 ha u 2026”.
Kaei ka jingeh kaba khraw duh jong ngi ha ka pule puthi, u Myntri Rangbah ula ong ba 9000 tylli ki skul LP ka Sorkar, 3000 tylli ki skul Upper Primary, 1700 tylli ki Secondary bad 500 tylli ki Higher Secondary, 80 tylli ki college-ka ratia ka bym ailad ia ki khynnah jong ngi ban ioh pule, watla ki kwah ban leit pule namar ka jingeh ban ioh rung klas.
U Myntri Rangbah u pyntip ba ka Sorkar ban weng ia kane ka jingeh, ha kine ki 8 snem kala plie haduh 23 tylli ki People’s College ba thymmai, shna ia ki college building ba thymmai ha Baghmara bad Williamnar, sdang ia ka college thymmai ha Mahendragank, ka State University, Engineering College ha Shilllong nalor kiwei kiwei.
Halor ka jingkyrpad ka MLA Meghtab Chandree ban shna ia ka gallery ha ka madan ialehkai ka skul Rimrangpara, u Myntri Rangbah ula kular ba ia ka kam yn sa pynsdang noh da ki bynta bynta.
