Shillong, Nailar 08 : U Myntri ka Tnad Pule Puthi Rakkam A Sangma ha ka sngi Ba-ar ula pyntip ba ka Sorkar Jylla kala iakren bad ka Sorkar Pdeng halor ka lawei jong ki samla pule ka Jylla, kiba la wanphet na ki jaka pule ka Jylla Manipur, kaba don hapdeng ka jingbym shongsuk shongsain.
U Rakkam u pyntip ha ki nongthoh khubor ba ki Kmie ki Kpa jong ki samla pule kila wan iakynduh ia u ha Tura bad pynpaw ia ka jingsngewkhia halor kane ka kam.
“Kane ka dei ka kam kaba khia bha bad u Myntri Rangbah ka Jylla ula iakren bad ka Sorkar Pdeng namar kane ka dei ka kam ba khlem ka jingai jingbit ka Sorkar Pdeng, kiei kiei kin ym urlong satia. Ban shim ia ki samla pule na kiwei pat ki University kam dei ka kam kaba suk” ula ong.
Ha kajuh ka por, u Rakkam uba dei ruh u Nongialam ka NPP, ula pyntip ba ki Nongialam ka NPP kila iakren ruh bad ka Sorkar Pdeng ha kaban wanrah noh ia ka jingsuk ha Manipur.
Ka kynhun jong ki Nongialam ka NPP ba kynthup ia ka MP na Jylla bad Manipur, kila iakynduh ia u Myntri kam Pohiing ka Ri Amit Shah ba un shimkhia ha kaban tuklar mardor ia ka jinglong jingman ha Manipur.
“Nga kyrpad ia ki para shynrang bad kynthei ha Manipur ba ka jingsuk ka dei kaba donkam tam ha ka Iing ka sem” ula ong.
