Nongpoh, Nailar 08 : Ka seng RBYF bad FKJGP-Umsning Circle, kila ioh ban bat ia khyndai ngut ki bar jylla kiba wan rung beain da kawei ka kali ba shimwai ka Tnad PWD ka Assam shapoh u pud u sam ka Jylla Meghalaya.
Ia kine ki bar Jylla la ioh ban bat na ka kali Tata Mobile AS-11-EC-0412 ba don ia ka jingthoh ‘On PWD Duty’ ha ka miet sngi Nyngkong na Umsning. Ia kine ki bar jylla bad ia ka kali la aiti noh sha ki Pulit ka Umsning Police Station ba kin pynphai pat sha Assam.
U President ka RBYF Usmning Circle samla Balakmen Nongbri bad Secretary ka FKJGP samla Steve Wahlang kila pyntip ba kane ka jingioh bat ia kine ki bar jylla ba rung beain ka dei namar ka jinglong phikir bad jingpeit ngor bha jong ki Dkhot ka Seng ban tehlakam ia ka jingwan rung beain ki briew ba nabar ban leit trei bylla sha kylleng ki jaka ka Ri-lum Khasi Jaintia.
Kila ong ba ki bar jylla kila sdang mynta da ki buit sianti bapher bapher ban wan rung tuh sha jylla bad ia kane la paw ruh na ka jingpyndonkam jong ki ia ka kali ba don ia ka jingthoh “On PWD Duty’. Kila ong ba kane ka dei ka buit ba kin ioh rung suk bad lait na ka jingshah talasi bad shah bat ha ka Tnad Infiltration bad ki sengbhalang.
Kine ki Nongalam kine ki arseng kila byrngem ban leh da kaba tyngeh ia kino kino ki briew na ki kynhun ne wat ki tnad Sorkar kiba pyrshang ban iarap pynrung tuh ia ki bar jylla kibym don satia ia ki kot ki sla kiba biang.
Halor kane ka jingjia, kine ki arseng kila phah ia ka khubor sha ki Unit bapher bapher ba kin long kiba peitngor bha ia ka rung ka mih ki bar jylla.
