Shillong Nailar 28: Kum shi bynta jong ka jingrakhe iaka jingdap 75 snem jong ka jingioh jinglaitluid ka ri India, ki shipai Border Security Force kila pynlong ia ka tem ka put ha ka 27 tarik mynta u bnai, ha Ram Krishna Mission Secondary School Shella, East Khasi Hills District kaba don ha khappud bad ka ri Bangladesh.
Ha katei ka tamasa, ka kynhun tem Brass & Jazz Band jongka BSF Meghalaya kala tem ia ki jingrwai ieid ri kiba la pynsngewtynnad bad pynshoh beij ia ki 500 ngut ki paidbah kiba la wan na kylleng ki shnong ki thaw kiba don ha khappud.
Ka jingthmu ka BSF ban pynlong ia kane ka prokram kadei shi bynta ban rakhe iaka ‘Azadi ka Amarit Mahotsav’ bad ban pynsngewthuh iaki paidbah ba kin don iaka jingiatylli kum ki nongshong shnong ka ri bad ban don ruh ia ka mynsiem ieid ri.
Ia katei ka tem ka put, la plie da u Mrinal Chakraborty, u Principal jongka RKM School kum u kongsan ha kaba la ia donlang ki heh shipai BSF bad ki riewpawkhmat ka thaiñ.
