Guwahati, Nailar 28 :U DGP ka Assam, u Bhaskar Jyoti Mahanta hynnin ka sngi Saitjain ula iathuh ba ki bor pulit haduh mynta kila ioh ban kem palat 34 ngut ki briew kiba don ka jingiadei bad ki seng lehnoh Al Qaeda na ki bynta bapher bapher ka jylla.
Naduh kine ki khyndiat bnai ba la lah, ki bor pulit ka jylla kila pynlong ka jingkhynra pyrshah ia ki jingtreikam jong ki kynhun seng lehnoh hapoh Assam.
Haba kren sha ki lad pathai khubor, u Mahanta ula ong, “Palat 34 ngut ki briew kiba don ka jingiadei bad ka Al Qaeda kila shah kem noh. Ki pulit ka Assam kin ym ailad ia kiba kum kine ki kam iasylla ba kin seisoh. Katto katne ki ktem ai jinghikai jong ki lehnoh la pynbit pynbiang da ki nong Bangladesh.
Nalor kata une u DGP ula ong ruh kiba bun tylli ki kynhun kieng atiar kiba thymmai kila mih ha kane ka thain da kaba ialam bakla ia ki samla na ka bynta ban pynrung dkhot ia ki.
Shuh shuh ula ong ruh, ‘Ki don bun jait ki skul madrassa hapoh Assam. Katto katne ki kynhun kiba thymmai kila nang mih bad shim kabu. Ki kam iasylla ki dei na shabar ka Assam, bad ia mynta hi napoh Bangladesh, bad ki kynhun kiba don ka jingiadei bad ka Al Qaeda kila ialam bakla ia ki samla ban pynphriang ia ki kam pyntriem.
Dang ha ka sngi Thohdieng ba la lah, ki pulit ka Assam kila ioh ban kem sa uwei u briew uba don ka jingiadei bad ka AL Qaeda ha ka Indian Subcontinent (AQIS) kumjuh bad ka Ansarullah Bangla Team (ABT). Ia une u briew la tip kyrteng kum u Hafizur Rahman Mufti uba dei na ki bynta jong ka Jogighopa kaba hapoh Bongaigaon district ka Assam.
U Hafizur Rahman u dei u nonghikai jong kawei ka skul Kabaitari Madrasa. Kane ka dei ruh ka sien kaba saw ba ki pulit kila ioh ban kem ia ki briew kiba don jingiadei bad ka AQIS/ABT tang hapoh ka shi taiew.
