Shillong, Jylliew 26 : U Deputy Commissioner ka West Garo Hills Jagdish Chelani, ula hukum ban pynlong ia ka jingtohkit halor ka video ba pyni ia ka jingshah bom shah tied ka samla Kynthei kaba syniem kum ka jingpynshitom ki lehnoh Taliban, ha Ri-lum Garo.
Ki Pulit kila sdang ban pyniaid ia ka jingtohkit halor kane ka jingjia, kaba jia ha kawei ka Shnong jong ka West Garo Hills.
Ki shynrang jong kane ka Shnong kila shoh naphang ia kane ka kynthei, patan jubor ia u sniuh bad bom da ki siej kat naba lap, khlem ka jingisynei wat hapdeng ka jingiam bad jingkyrpad na kane ka samla ba kin sangeh.
Kane ka jinglong riewkhlaw ki briew kala paw haba wat ki kynthei jong ka Shnong kiba sakhi ia kane ka jingjia, kila aiding bad pynshlur ia ki shynrang ba kin shoh kin bom ia kane ka kynthei.
Tang uwei u riew rangbah ula ieng bad pyrshang ban pynsangeh ia kine ki nongshoh hynrei ula shah khynniat pynban khlem ka jingpyrwa eiei ruh em.
Kum kine ki jingjia ki kham niar ban jia ha kane ka juk mynta lait noh tang ha ki Ri kiba synshar ki lehnoh kum ka Afghanistan bad Pakistan kiba ju pyniaid ia ki kashari kangaroo bad ai ka jingpynsajia ba tohmet bha wat ia I kam bymman iba rit duh kum ka kam tuh kam thiem bad kiwei kiwei.
