Shillong, Jylliew 05 : Ka Iingkashari Special Judge (POSCO) ka East Jaintia Hills, kala hukum ban set along haduh 25 snem ia uwei u nongleh beijot khynnah halor ka kam bymman ba ula leh ha ki thain Khliehriat.
Une u runar u kyrteng u Boti Surong uba la shah pynngat ha ka kyndon 6(1)jong ka POCSO Act. Ka Iingkashari kala hukum ban set 25 snem ia u ha along lem bad ka kun aba T.30,000 bad lada um lah siew un hap shong along sa 2 bnai.
Kane ka case ka dei kaba la register hapoh ka Khlieh Women Police Station Case No. 32(07)2023 bad la tohkit ia ka da ka WPSI L Siangshai.
Kumjuh ruh ka Iingkashari ka District & Session Judge kala hukum ban set along 10 snem ia arngut ki runar uba donkti ha ka kam leh beijot. Kine ki runar ki kynthup ia u Ioobha Phawa bad u Indri Dkhar.
Kine ki arngut kila shah tian bishar kat kum ka Khlieh PS case no. 43(06)2023 ia kaba la pynngat hapoh ka kyndon 363/376/34 IPC.
Ka Iingkashari hadien ka jingbishar kaba bniah kala pynngat ia kine baroh arngut hapoh ka kyndon 376 (2)(g)/34 IPC bad hukum ban set along 10 snem ia ki lem bad ka kuna ba mar T.5 hajar.
