Shillong, Jylliew 05: U Myntri ka tnad Jngohkai u Bah Paul Lyngdoh ha ka sngi Palei ula ong ba ka rukom leh jong ki National Media ka pyni shai kdar ba kim sngewthuh eiei shaphang ka Meghalaya bad ka jingkwah ban pynbudnam ia ka jylla bad ia ki nongshongshong jong ka.
Haba pynrem jur ia ka rukom ai khubor ka bym shisha jong ki National Media ha kaba iadei bad ka jingjah jongki shi kurim na Indore, u Bah Paul Lyngdoh ula ong, ba ki National Media man la ka por hi kidei kiba leh shilliang pyrshah ia ka thain shatei lam mihngi jong ka ri bad ki iohi ba ka jingkiew jong ka Meghalaya ha ka kam jngohkai kadei kaba buh ia ki ha ka jingma.
“Kumta kane ka rukom leh, ka dei kaei kaei kaba hap ban pynrem jur bad kaei kaei kaba sngewkhuslai bha”.
U Bah Lyngdoh ula ong, ba ka jingshah pyniap ba dang shen u nong Indore u Raja Raghuvanshi ka dei ka jingjia kaba jia shisien lano eh.
“Haka jingshisha ngim pat lah ban tip kaei kaba la jia katba ym pat dep lut ka jingtohkit baroh, yn ym pat lah ban ong eiei halor kane ka kam. Kumta, nga pynrem jur ia ka rukom leh jong ki National Media. Ka pyni ia ka jingleh shilliang ka jongki pyrshah ia ka thain bad khamtam ia ka jingkiew jong ka kam jngohkai ha ka Meghalaya, ki iohi ba ka long ka jingma” ula ong.
“Hynrei ngan pynkynmaw ia ki bad ia ki briew jong ka Meghalaya ba ka kam jngohkai kala iaid da ki phew phew snem ha Sohra khlem kano kano ka jingbit snam ha ka jinglong ka jongka. Kam shym la don kano kano ka rekod jong kano kano ka jingjia jong ka jingiaumsnam ha ki snem kiba la leit bad ngi la don ia ki mishoneri kiba nyngkong eh kiba la poi ha Sohra ha u snem 1841, ngi don ia ka Ram Krishna Mission, kaba dei ka kynhun kaba heh tam ha ka jingbun shnad ha ka jylla, kaba don ia ka Headquarter ha Sohra. Kumta, kane ka jingleh ka pyni ba ki duna ia ka jingsngewthuh ia ka Meghalaya bad ka dei ruh ka jingpynthohbria pyrshah ia ka jylla bad ia ki paidbah” la ong u Myntri Sorkar.
Ha kawei pat ka liang, kane ka jingwad ka dang iai bteng ban lap ia ka Soanam Raghuvanshi ka kurim jong u Raja Raghuvanshi uba la khlad noh.
