Nongpoh June 5 : U Myntri ka tnad Animal Husbandry Bah A.L. Hek, ha ka sngi Palei u la buh mawnongrim ban tei ia ka Regional Semen Production Laboratory and Semen Bank na bynta ban pynkha symbai ia ki langbrot bad ki blang ha Kyrdem Kulai.
Ia kane ka project la trei lyngba ka National Livestock Mission (NLM) ban kyntiew bad ban pynbit pynbiang ia ka jingdonkam jong ka jylla.
Ha kane ka programme la wan ban shimbynta lang da u F.R. Kharkongor, Principal Secretary, Animal Husbandry & Veterinary Department, ka Dr. M. Kharchandy, Director, A.H & Veterinary, u Bah Raja Brahma, ADC, Ri Bhoi District, Bah R. Nongbri, Rangbah Shnong ka Kyrdemkulai 5 Kilo, lem bad kiwei kumjuh ki nongri jingri.
Haba kren kum u kongsan, u Bah Hek, u la pynpaw ia ka jingkmen bad ai jingiaroh ruh ia ka tnad bad ka kynhun jong ki na bynta ka jingtreishitom ban pynurlong ia kane ka project, da kaba kdew ruh ia ka jingdonkam ban iatreilang na bynta ka jingjop jong kane ka project, namar kan pynmyntoi pat ia ka jylla bad ia ki nongri jingri.
“Kane ka project kam dei tang ka jingtei hynrei ka dei ka jingkyrkhu ia kane ka thain khamtam ia ki nongri jingri ban kyntiew ia ka kam ri mrad bad ban pyndap ia ka jingdonkam doh jong ka jylla hi baroh kawei”, ong u Bah Hek.
Ha kane ka programme la pynlong ruh ia ka jingthung ia ki symbai dieng kum ka jingrakhe ia ka World Environment Day, da kaba pynkynmaw ia ka thong jong ka sorkar jylla ban iada ia ka mei mariang.
