Shillong, Rymphang 24 : Ka Iingkashari Meghalaya High Court kala bthah ia ka Sorkar Jylla ban bud ia ki kyndon treikam kumba la buh ban lah wanrah jingkhuid ia ka pung Umiam.
Ha ka hukum ba pynmih ha ka 19 tarik Rymphang haba pynwai noh ia ka PIL, ka Division Bench ba kynthup ia u Chief Justice S Vaidyanathan bad Justice W Diengdoh la ong, “Kumta, ia ka PIl No.10 ba 2019 la pynwai noh da kine ki kyndon harum, kiba dei ban bud da ka Sorkar Jylla kumba ki long”.
Ka Iingkashari kala maham “Lada don ka jingbym bud kyndon na ka liang ki Ophisar kiba dei ban pyntreikam ia ki kyndon haneng, dei ban ai ka jingpynshitom ia ki bad ban pynrung ruh haka service register ban pynduh lad ba kin kiew kyrdan”.
Ki kyndon ki ong “Lada don ki nongkynti paidbah bala ithuh/ kam pat halor ki hukum/ ka jingtuklar jong kane ka Iingkashari, dei ban pynieng noh da ka sign board steel ba don ia ki bar code & case number ha ka jaka ba kyndiang bha”.
Ka ong ba ia kine ki jaka bala ithuh dei ban pynmih ha baroh ki website ka Sorkar khnang ban khanglad ia kiwei ba kin nym kyntur sha ki nongkynti paidbah.
Ka kyndon ka ong ruh “Ym dei ban ailad ia ka jingbuh dukan madan bad pynieng kali ha kine ki jaka paidbah lait noh kiba iaid kat kum ki kndon ain. Ym dei ban ai jingbit ban pyndonkam ia kine ki jaka kum kijaka ieng Auto/Tazi, kaba pynthut ia ka iaid ka ieng ki paidbah bad ki kali lait noh kiba la ioh jingbit”.
Ka ong ruh “Ym don mano manor uh ba lah ban pynieng ia ki jingtei ba shipor ne ba shirta ha kine ki jaka ne ha ki lynti iaid, dada don, khlem da ioh jingbit na ki bor ba dei khmih. Lada don kino kino ki jingtei ba khlem ioh jingbit, ki bor khmih ki dei ban leh eiei marmar ha kaban pynpra noh ia ki”.
