Shillong, Jylliew 04 : U Myntri kam Pohiing ka Ri Amit Shah ha ka sngi Palei ula ong ba ka jingiap jong ki riew paidbah ha ka thain Shatei Lam Mihngi kala hiar da 86% ha kine ki 12 snem tam, haba shim kum ka jingjop kaba khraw kaba la wanrah ia ka jaka na ka bynta ka roi ka par bad ka jingkynshew kam.
Haba kren ha ka 73rd Plenary ka NEC ha Shillong, u Amit Shah ula pyniasnoh ia ka jingduna ki kam umsnam sha ka jinglah ban iasoi ia bun ki soskular iasuk hapoh ka Sorkar u Modi.
“Hapoh ka Sorkar u Modi, ka jingdon jong ki riew paidbah ba iap ha NE kala hiar da 86% ha kine ki 12 snem tam, kaba dei ka jingjop kaba khraw” ula ong.
“Palat 12 tylli ki soskular iasuk kila wanrah ia ka jinglong jingman kaba biang palat na ka bynta ka roi ka par jong ka Jylla” ula ong haba pynpaw “Da ka jingpynduh jait ia bun ki kam kaikhlaw, nga kyntu ia ki Myntri Rangbah jong ki Jylla ba kin phaikhmat noh sha ka kam pulit ba man ka sngi bad ka hok ki nongshongshnong”.
“Ka thain Shatei Lam Mihngi ka dei ban sdang thymmai noh bad ban iada ia ka hok jong kiba duk, ki kynthei bad ki khynnah ki dei ban long ki kam ba hakhmat eh” ong u Amit Shah.
Ula ban jur ban pynsted ia ka jingai ia ka jingbishar ba hok kat kum ki ain ba thymmai bad ka jingpyndonkam ia ka technology.
“Pynthikna ia ka jingbishar bah ok hapoh ka Nayaya Sanhita ba thymmai, kyntiew ia ka jingpyndonkam ia ka technology ha ka rukom ai jingbishar bahok ia ki nongleh bymman, pynkhlain ia ki jingpynngat kam bymman lyngba ka jingpyndonkam ia ka forensic science, bad ban thaw ia ka rukom treikam ba shu leh online ban register ia ki case bad kumjuh ruh ka jingai sakhi ba online ha ki Iingkashari, khnang ba man ki nongshongshnonng kin ioh ia ki hok ba ki dei ban ioh bad ka jingbishar ba hok” ong u Amit Shah.
Halor u droks, u iathuh ba ka Sorkar Pdeng kala buh ia ka thong ban pynduhjait. “Ka Sorkar India kala thaw ia ka Special Action Plan ryngkat ka rukom treikam kabym don jingisynei ban pynduhjait ia ka jingkhaii bad jingdih ia u droks hapoh ka thain Shatei Lam Mihngi” ula ong.
U bynrap ba ki Myntri Rangbah ki Jylla ki dei ban pynleit jingmut ha kaban pynsngewthuh ia ki paidbah ia ka hok jong ki kat kum ka riti synshar bad pynthikna ba kin ioh ia ki jingiada.
