Shillong, K’lyngkot 17 : U MDC ka Nongkrem Bah Lambor Malngiang ha ryngkat ki Nongialam ka Balang Presbyterian, Nongkrem, ha ka step sngi Palei, kila hiar jurip ia ka surok na Iewpynsin, Nongkrem sha Nongkyndong, Mawpynthih ban shna pynbha noh ia ka kum ka jingpynkhreh ia ka jingwan jong ka Jingiaseng Samla ka KJP Synod Pdeng, ka ban long ha u bnai Rymphang.
Kane ka surok ka dei kaba la sniew bad bun satang ki thliew ki syar suda, kaba la buh haka jingeh wat ia ki kali ba kin iaid kin ieng.
Ha kane ka jingjurip la iadonlang ruh ki Bor pyniaid Shnong ka Nongkrem Dorbar Pyllun lem bad ki Engineer na ka Tnad Public Works Department (PWD) ka Jylla.
Lah ban kdew hangne, ka Balang Presbyterian Nongkren kala ioh ban pynlong ia ka Jingiaseng Samla ba nyngkong eh jong ka Khasi Jaintia Presbyterian Synod Pdeng, kaba la buh ban long ha ka 28 tarik Rymphang, 1 tarik bad 2 tarik u bnai Lber mynta u snem.
Hashuwa kane ka jingjurip, kala don shuwa ka jingiamir jingmut hapdeng ki Bor pyniaid ka Balang bad u Bah Lambor Malngiang na ka bynta ban shna pynbha ia ki surok, ki lynti syngkien, ka jingpynbiang ia ka umbam umdih, ki jaka ieng kali bad kiwei kiwei ki jingdonkam na ka bynta katei ka Jingiaseng.
U Tynmen Basan Rangba ka Balang Bah Bhalang Lyngdoh uba dei ruh u Chairman ka Nongkrem Dorbar Pyllun, ula iathuh ba ka jingdonkam kaba hakhmat eh ka long ban pynbha ia ki surok bad ki lynti syngkien namar ka jingwan jong ki para bangeit na kylleng ki jaka.
U Rangbah Shnong ka shnong Nongkyndong Bah Donkupar Kharbuli ula pynpaw ba ki Nongshongshnong kila angnud la slem ban iohi ia ka surok kaba bha ha ka thain haba kdew ba katei ka surok ka dei kaba donkam bha namar ka dei kaba pyniasoh sha kiwei kiwei ki shnong ba marjan.
U Bah Lambor Malngiang ula kular ban phah maramot noh ia katei ka surok haba pynpaw “Ia mynta hi ka por kala khim palat hynrei ngin hap maramot pat ia ka na ka bynta ka burom jong baroh lang”.
Ula pynpaw ba kum u Nongmihkhmat u hap ban shim ia ka jingkitkhlieh ban iada ia ka burom jong ka Constituency bad pyntip ba un sa sei hi ia ka pisa na ka pla lajong ban shna pynbha ia ka surok bad kiwei kiwei ki jingdonkam.
“Ia mynta hi kam pat don kano kano ka jingpynkhreh mang tyngka ia kine ki kam hynrei ngan sei hi nala ka jong ka pla ban pynbiang ia ki jingdonkam” ula ong.
