Shillong, K’lyngkot 17 : U Symbud Myntri Rangbah ka Tnad kam Pohiing Bah Prestone Tynsong ula ong ba ka jingioh ia ka jaka shipai lah ban niew kum ka lynti kaba paka eh ban pynbeit ia ka kam ba sahteng ha kaban pynkynriah ia ki 342 tylli ki Longiing na Them Metor na Them Iew Mawlong.
Haba iakren bad ki lad pathai khubor ha ka sngi Thohdieng, u Bah Prestone ula ong ba ka Sorkar Jylla kala kyrpad ia ka Sorkar India ba lada long ban mynjur ha kaban ai tang 2.5 lane 3 acre na ki jaka shipai bym iehshrah, kaba adon mar pyrshah ka Petrol Pump ha Iew Mawlong.
“Lada ka Sorkar India ka lah ban leh ia kata, nga thikna ba yn ym shimpor, ngin sa lah ban pynbeit ia kane ka kam” ula ong.
Halor ka kam ba iadei bad ka Gurudwara, u Bah Prestone ula ong “Ngin dang ban poi sha kane ka bynta jong ka jingiakren (ban pynpra ia kane ka jaka mane) namar kat kaba ka Harijan Panchayat Committee (HPC) ka ongm gi kwah ban ioh ia ka jaka marjan kane ka jaka ba rim bad kane ka dei kaba ngi pyrshang da kaba kyrpad ban ioh ia ka jaka shipai hangtei”.
Ha kawei ka liang, u Symbud Myntri Rangbah ula ong ba ka Sorkar Jylla kala dep ban pynkhreh ia ka blueprint (plan) lada jia ba kam ioh satia ia ka jaka shipai.
“Lada ngim ioh, ngi la dep pynkhreh ia ka blueprint (plan). Ka Sorkar kala dep pynkhreh lut nadong hadong. Kala don ha ka kti jong ngi” ula bynrap.
Haba pynpaw ba ka Sorkar ka dang ap ia ka rai ka Sorkar Pdeng halor kane ka kam, u Bah Prestone ula ong “Mynta ngi hap ban shu ap bad lehse da ka jingkyrkhu jong ka Sorkar India ngin ioh ia katei ka jaka kaba ngi la tyrwa bad wat ka HPC ruh kala tyrwa”.
“Lada ngi ioh lehse kan dei kaba paka palat ban pynbeit ia kane ka kam” ula pynkut.
