Shillong, Naitung 30 : U Myntri ka tnad PHE jong ka sorkar jylla Bah Renikton Lyngdoh Tongkhar u la ong ba ka sorkar ka la pyrshang borbah ban pynbeit lut ia ki jingeh kiba don ha ka tnad bording.
Ia kane u Myntri u la ong haba kren kum u Kongsan ha ka Grand Finale jong ka Ujjwal Bharat Ujjwal Bhavishya, Power@2047 kaba long ha Soso Tham Auditorium kum shi bynta ban rakhe ia ka Azadi Ka Amrit Mahotsav – kata ban rakhe dap 75 snem ka jinglaitluid ka Ri.
Shuh shuh u Myntri u ong ruh ba ka sorkar mynta ka thmu ruh ban mang thymmai haduh 300 tylli ki transformer ban bujli noh ha baroh kito ki jaka ba don ki transformer ba la duh ne kiba la thut kiba don ha ki shnong ki thaw.
Kumta u kyntu ia baroh ban ai ka jingiatreilang khnang ban lah pynurlong ia katei ka thong bad khamtam eh ban pynlong ia ka Meghalaya ka jylla ba pahuh bording.
Nalorkata u Myntri u ai ruh ka jingiaroh ia baroh na katei ka tnad kaba ki paidbah ki ïoh khamtam eh ban pyntikna ba kan baroh ki longiing kin ioh ia ka bording ha ki Ïing ki sem jong ki.
Ha kane ka prokram ka la don ruh ka jingia kren lyngba ka video conference halor ka Bijli Mahotsav ha kaba u Myntri Rangbahduh ka Ri u ia kren bad ki paidbah ba ioh jingmyntoi na kylleng ki bynta jong ka ri.
Lah ruh ban kdew hangne ba ka Bijli Mahotsav kadei ka rynsan ban rakhe ia ka jingiatreilang hapdeng ka jylla bad ka sorkar pdeng haba iadei bad ka tnad bording.
Ha kane ka sngi la donlang ruh naduh u Bah D. P. Wahlang, IAS, Additional Chief Secretary bad CMD ka MeECL kum u Symbud Kongsan nalor kiwei kiwei kynthup naduh u Dr Shakeel P Ahammed, IAS, Principal Secretary ka tnad, Kong Isawanda Laloo, IAS, Deputy Commissioner East Khasi Hills District, u V. F Desouza, CPSE State Nodal Officer bad kiwei kiwei.
