Shillong, K’lyngkot 21 : Ka Elekshon MLA-2023 kan iohi ia ka jingiakhun kaba jur hapdeng ki lai tylli ki Seng (triangular fight)-ka National People’s Party (NPP), United Democratic Party (UDP) bad ka Indian National Congress (INC), hangne ha Ri-lum Khasi Jaintia kaba don 36 tylli ki Constituency bad ka result jong ka Elekshon ka lah ban pynkyndit ha kiba bun ki constituency.
Kat kum ka jingiaid wad khubor Ka Shlem, la sngewthuh ba ka tarajur ka kham noh sha ka NPP namar ka jingdon bun ki kyrtong kiba dei ki MLA ba mynta, ki MLA barim ba wan kynthih na kiwei pat ki seng bad kumjuh ruh ki MDC sha ka Iingdorbar jong ka Khasi Hills Autonomous District Council (KHADC).
Ki MLA ba mynta ki ban mih iakhun na ka NPP kaba bat ia u lakam ka jingsynshar ha kine ki san snem bala lah, ki don haduh 16 ngut kynthup ia 7 ngut kiba dang wan pyniasoh na kiwei pat ki seng hadien ka jingiehnohkam kum ki MLA.
Kine ki 7 ngut ki MLA ba dang shu pyniasoh shen ki dei u Bah Shitlang Pale na ka INC/AITC (Saipung-Sutnga), Bah Jason M Sawkmie n aka PDF (Umsning), Kong Ampareen Lyngdoh na ka INC (East Shillong), Bah Mohendro Rapsang na ka INC (West Shillong), Bah Samlin Malngiang na ka HSPDP (Sohiong), Bah Hamletsoh Dohling na ka PDF (Mylliem), bad bah Kimfa Marbaniang n aka INC (Rambrai-Jyrngam).
Haduh 4 ngut ki dei ki MLA barim ka Jylla kiba kynthup ia u Bah Nehlang Dhar (Khliehriat), u Bah Stephen Mukhim (Amlarem), Martin M Danggo (Ranikor), bad Bah Kenedy Khyriem (Mawphlang) .
Na ka jingkhein ba iohlum, ka NPP ka don ha ka jingiakhun haduh 28 tylli ki Constituency bad bun ki dei kiba ka lamkhmat ha ka jingiakhun. Katba ka UDP ka don 13 tylli ki Constituency bad ka Indian National Congress ka don 12 tylli kiba ki lamkhmat nalor kiwei ki party rit kynthup ka HSPDP, PDF bad ka BJP bad kumjuh ruh ka AITC kaba lah ban jop na ki katto katne ki constituency.
Na kine ki 28 tylli ki constituency, ka jingiakhun jong ka NPP ka kynthup ia 8 tylli ki constituency bad ka Congress, 7 tylli bad ka UDP lait noh ka Mairang ba khlem pynieng kyrtong, 2 tylli bad ka PDF bad mar kawei bad ka HSPDP bad ka BJP lait noh ka South Shillong ba khlem pynieng kyrtong.
Hynrei ka jingiakhun ha baroh kine ki constituency ki dei kiba iatan tyllai bad kaba lah ban kylla katba ka sngi ka ia ka dang tyllun shajan jong ka sngi ba ki paidbah kin shim rai ia u kyrtong ba kin phah mihkhmat sha ka Iingdorbar Thaw Ain ka Jylla.
Ka North Shillong Constituency ka dei ka Constituency ka bym pat lah ban batai shano ka tarajur ka noh namar ka jingdon bun ki kynrem ki lyndan kiba mih aireng ba kynthup ia ki MLA barim bad ki Heh Ophisar ka Jylla bala shongthait.
Kiwei pat ki constituency ki bym pat lah ban batai ia ka lyer jong ki kyrtong ka NPP lait noh ka Mairang bad ka South Shillong ki bym pynieng kyrtong, ki dei ka Pynthorumkhrah Constituency, ka Nongthymmai Constituency, ka Mookaiaw Constituency, ka Sohra Constituency bad ka Madthadraishan Constituency.
Ka Election Commission ka Ri India (ECI) kala pynbna ba ka 27 tarik u Rymphang kan dei ka sngi thep vote jong kane ka elekshon MLA-2023 bad ka 2 tarik u Lber kan dei ka sngi niew ia ki vote.
Ka jingialap elekshon mynta kala sdang shaid shaid ha manla ki constituency bad ki thma ktien lem bad ki jingkawang ktieh kila sdang mynta ban khring ia ka jingshaniah jong u paidbah.
