Guwahati, K’lyngkot 21 :Ha kawei pat ka jingjop ha ka jingiakhun pyrshah drok ha Assam, ki pulit ka nongbah Guwahati ki la ioh ban kurup haduh 101 kilo u kynja napoh kawei ka trok ha ki bynta ka Jorabat hynne ka sngi.
Ka kynhun pulit hapoh ka jingialam jong u Joint Commissioner of Police ka Guwahati u Partha Sarthi Mahanta ki la lapdien ia kawei ka trok ha Jorabat ha ka por ka jingpynlong ia ka jingtalasi bad ioh ban kurup shibun bah u kynja ia uba la buhrieh hapoh jong kane ka trok.
Hadien kane ka jingkhynra la ioh jingtip ruh ba kane ka trok ka dei ka ba wan na Tripura bad ba ka don ia ka jingthmu ban leit sha ki bynta shatei jong ka ri.Hadien ka jingbishar bniah la pynpaw ba une u kynja ba la ioh kurup u shongdor haduh kumba T.1 klur ha ki jaka iew beain.Halor kane ka jingjia la kem noh ruh ia arngut ki briew bad ka jingtohkit pyrshah ia ki ka dang iaid shakhmat.
Ha kawei pat ka jingioh kurup drok kaba heh bha, ki pulit ka Karimganj ha ka 17 tarik mynta u bnai ki la ioh ban kurup haduh 88 kilo u drok Yaba tablets na Nischintapur kaba hapoh Bagargul hapoh Karimganj district ka Assam.
Kane ka jingioh kurup kaba lah ruh ban dei kaba heh tam hapoh Assam kat haduh mynta kala wan long hadien ba ki pulit kila ioh ban bat noh ia kawei ka kali Alto kaba don ia u nombor AS-10A-6487 bad ioh kurup ia kine ki dawai kuli.Hadien ba la bishar bniah la pynpaw ba une u drok u shongdor haduh palat T.40 klur ha ki jaka iew beain jong ki ri ka pyrthei.
