Shillong Kyllalyngkot, 15: Ka Nongiasaid aiñ ka jylla Kong Finela Lyngdoh Nonglait hynne ka sngi Nyngkong, kala pynpaw iaka jingthmu ba kan mih iakhun ia ka elekshon MP Lok Sabha na Shillong Constituency hynrei ia ka rai kan shim lada ka ioh ticket na ka Bharatiya Janata Party (BJP).
Haba iakren bad ki nongthoh khubor ka Kong Finela kala ong ba kala iaid shakhmat ban pynkhreh iaka elekshon MP Lok Sabha naka seng BJP na Shillong Constituency bad lada ka iakhun ia ka elekshon ruh kan buh beit hakhmat ia ki mat jong ka jaidbynriew.
Lah ban kdew hangne ba ka kong Finela Lyngdoh Nonglait, kala leit pyniasoh ialade sha ka BJP ha ka 22 tarik Nohprah 2023 bad kane ka jingleit iasoh ka long eh ha kaban pan ia ka ticket ba kan iakhun Lok Sabha.
Ka kong Finela ka dei ka Khun Pyrsa jong u Nongialam ka HSPDP (L) Bah Hopingstone Lyngdoh Nonglait.
“Lada jia ba ka BJP kam ai tiket ngan ym mih satia ban iakhun iaka elekshon kum ka kyrtong khlem seng da lei lei ruh bad ngan ym pynsepei iaka vote jong ki paidbah namar lada sepei ka vote, kan sepei ka jaidbynriew bad ngan nym poi shano shano ruh ban iakhun kum ka Independent” kala ong.
Ka kong Finela kala ong “Nga la iakynduh ia ki nongialam jong ka BJP bad nga la pynsngew ia ki kyndon jong nga sha ki bad kaba lyngngoh ka long ba kam shim por ia ki ban sngewthuh ia kata bad kala long kumba ki mynjur bad kila sngewthuh ia kita ki jingpynshai kiba nga la ai ha ki”.
