Nongpoh, K’lyngkot 15: Ka mynsiem trei shitom bad ban ieng hala ki jong ki kjat wat hapdeng shibun ki jingtynjuh, kala plie lynti ia uwei u Samla ka them Ri-Bhoi ban long u nongsengkam bad nongaikam ia kiwei pat ki para samla lyngba ka kam ba u trei.
Une u samla u kyrteng u samla Kolshi Kathar uba dei na ka shnong Pynker C, Ri-Bhoi District, kaba don ha khappud ka Jylla Meghalaya bad Assam.
Une u Samla ula seng ia kawei ka jaka leitkai pyngngad kaba don hapdeng ka khlaw, ia kaba ula ai kyrteng ka Mribu Jungle Camp, bad kane ka Camp kan plie ia ki paidbah kiba ieid mariang bad kiba kwah pynjahthait ne pyn pyngnad ialade ba kin wan ban don bad ka mariang.
Ha kane ka Jungle Camp, ka don ruh kawei ka pung bad ki jaka sah (tent house) bala shna kyrpang ia kiba kwah ban wan sahmiet.
Ia kane ka Jungle Camp la plie paidbah hynne ka sngi da u Fr Kmenlang Nongrum, Parish Priest ka Byrnihat Parish, uba la shim ruh ia ka bynta ban kyrkhu kyrdoh ia kane ka jaka ryngkat ki jingduwai ba u Blei un nang kyrkhu ia une u samla.
U samla Kolshi Kathar ula iathuh ba ka jingseng ia kane ka Jungle Camp namar ka jingeh ba u iakynduh ha ka wadkam wadjam bad pynpaw pat ia ka jingkmen ba lyngba kane ka kam ba u seng, un sa lah ban aikam ia kiwei ki samla jong ka thain.
“Nga la thep shibun ki kam sorkar, ki kam haki kompani hynrei ngam shym la ioh bad kane kala pynlong ïanga ban phai khmat sha kane ka kam namar ka don ka jaka kaba la ai sngewbha da I mei bad I pa bad nga iohi ba katei ka jaka long kaba biang eh ban pynkylla dur ïaka sha ka jaka kaba ki paidbah ki lah ban leitkai bad shongkai pyngngad bad pynjahthaid ïalade” ula ong.
“Nga la pyrshang ban wad lad ban shim da ka ram ban shna pynbha ïa katei ka jaka” ong utei u samla.
Halor ka kyrteng Mribu Jungle Camp, u samla Kolshi ula ong ba kane ka kyrteng kala mih namar katei ka khlaw ba buh ia kane ka Camp ka dei kaba kyrteng ka Mribu ha ki por mynshuwa na ka jingdon jong uwei u dieng ba ki shait khot Mribu.
Une u Samla ula khot bad wer ia ki paidbah ba kin wankai ban pynjah thait ialade sha kane ka camp.
