Nongpoh, Ïaiong 19: Ki paidbah Nongthep Vote jong ki shnong ha Block-II, kaba don hapdeng ka jingiakajia pud bad ka Assam, kila ioh ban pyndep iala ka kamram ban jied ia u/ka MP, ba mihkhmat ia ka Shillong Parliamentary constituency sha Lok Sabha.
U District Election Officer (DEO) ka Ri-Bhoi Arpit Uphadhyaya ula pyntip ba ka thain Block-II ka dei kaba la ithuh kum ka jaka ba lah ban mih huri hura (vulnerable) hynrei ka jingthep vote hynne ka sngi Thohdieng, kala iaid suk khlem kano kano ka jingpynthut.
“Baroh ki paid nongthep vote ka Block-II kila ioh iashimbynta laitluid ban pyndep ia ka hok ban jied nongmihkhmat” ula ong.
Haba pyntip ba ka jingiathep vote kala iaid beit iaid ryntih ha baroh 5 tylli ki Assembly constituency jong ka District, u Arpit ula ong “ Ka don tang kawei ka jingjia kaba rit ha ki thaiñ Umsning ha kaba uwei u briew u la pyrshang ban pynthud hynrei ki bor pulit haka jingiadon ryngkat lang ki Magistrate, ki la kem noh ia u bad ialam medical test. Ki Pulit kin sa leh ia kaba donkam halor kane ka jingjia”.
U Arpit u pyntip ba kat kum ki jingkhein bala ioh kat haduh ka por 4 baje janmiet, ka jingpoi thep vote jong ki paidbah hapoh ka District ka kot ia ka 64%.
Hynrei ula ong ba kane ka jingkhein ka lah ban nang kiew hadien ba baroh ki kynhun pyniaid elekshon kila aiti lut ia ki kaiphod.
“Ngi khmih lynti ba ka jingpoi thep vote ki paidbah kan long hapdeng 68 haduh 70%” ula pynpaw.
