Shillong Iaiong 19: Ka jingthep Vote ha ka jylla Meghalaya hynne ka sngi Thohdieng, kala kynjoh sha ka 72.33% ha ka Shillong bad Tura Parliamentary Constituency.
Ka jingthep vote mynta ka kynti la khmih lynti ba kan kham bun shuh shuh ban ia ka MP Elekshon kaba la long ha u snem 2019 kaba long 71.42% katba mynta ka kynti kala kynjoh sha ka 72.33% haduh ka por 7 baje mynmiet.
Kila don 10 ngut ki kyrtong kiba iakhun ia ka elekshon MP kata 6 ngut na Shillong Parliamentary Constituency bad 4 ngut na Tura Parliamentary Constituency.
“Ngin dang ban ioh ia ka percentage kaba pura jong ka jingpoi thep vote ki nongthep vote ha ka jylla hynrei shisien ba ngi la ioh pdiang ia ka jingkheiñ kaba pura, ngi khmih lynti ba kan dang don ka jingkiew ka jingkhein” ong u Chief Electoral Officer (CEO) Dr BDR Tiwari haba iakren bad ki nongthoh khubor.
Ula ong, ba kala don ka jingkiew ha ka jingthep vote ha ka Shillong parliamentary constituency katba ha Tura kala hiar.
“Haduh 5 baje janmiet, ka jingpoi jong ki nongthep Vote ha Shillong ka long 71.26% bad ha Tura ka long 69.31%,” ula ong haba bynrap ba ka jingpoi ki nongthep vote ha Tura ha u snem 2019 ka long 81.38% bad ha Shillong ka long 65.48%.
Ula pynpaw ia ka jingkmen ba ka election kala iaid beit khlem da don kino kino ki jingjia.
“Nga dap da ka jingkmen ba ka elections kaba 18 jong ka Lok Sabha kala pyndep ha ka jingjai jai. Ym shim la don kino kino ki jingjia na kano kano ka jaka. La pynlong ia ka election ha ka jingjai jai bad ha ka rukom kaba shongshit” ula ong.
Ula pyntip ba ha ka jingleh ia ka Mock Poll bad ha ka Polling 47 tylli ki BU, 34 tylli ki CU bad 109 tylli ki VVPAT la dep ban bujli noh bad la pyndep ia katei ha ka por kaba biang.
Ula iathuh ba la leh ruh ia ka Webcasting ha palat 1886 tylli ki jaka thep Vote ban khmih bniah ia ka rukom pyniaid ia ka elekshon.
Ha kaba iadei bad ka jingpynkhein ia ka Model Code of Conduct (MCC) u Dr Tiwari ula ong, “Ngi la ioh ia ki jingtip ia kane bad u Returning Officer jong ka Shillong ula shimkhia ia kane. Ula dep ban ujor ia ka Ejahar. U RO ula shimkhia bad ula shim ruh ia ki sienjam kiba tyngeh”.
Ula kren ia katei halor ka jingjia ba uwei u nongthep Vote ula shondur ia ka kor EVM ban pyni ia ka jingkyrshan ia kawei ka seng saiñ pyrthei bad uwei uba la rah ia ka shap jong kawei pat ka seng ha ka por ba u leit ban thep ia ka Vote.
Haba kylli hato yn dang khein ne ym kheiñ shuh ia katei ka Vote, u CEO ula ong, “Kan long kaba eh kumba ka long, hynrei shisien ba ngi lah dep ban khmih bniah ia katei ka jingjia ngin sa leh ia ka ba donkam”.
Ula pyntip ruh ba ka Model Code of Conduct kan dang iai bteng ban treikam haduh ka sngi ba la dep pynbna ia ka result jong ka elekshon MP ha ka 4 tarik u Jylliew 2024.
Nalor kane, u CEO ula pyntip ba la pynjur ia ki jingpahara ha ki 13 tylli ki Strong Room kiba don ha ki 12 tylli ki District bad ha kawei ka Civil Sub Division.
“7 Pyrton ki CAPF kin donbynta bad ki pulit kila dep ban pynkhreh ia ka plan kaba pura ha ryngkat ka jingiasyllok bad ki Deputy Commissioner bad SDO, kumta baroh ki jingdonkam la dep ban pynbiang na ka bynta ban pahara ia ki Strong Room. Ki don 13 tylli ki Strong Room 12 tylli ki don ha ki District Headquarters bad 1 ha Sohra Civil Subdivision,” ula ong.
Ula ong ruh ba ka jingniew vote kan long ruh ha baroh kitei ki 13 tylli ki jaka.
