Shillong, Iaiong 19 : U kyrtong ka Voice of the People Party (VPP) Dr Ricky AJ Syngkon ha ka sngi Thohdieng, ula pynpaw ia ka jingsngewskhem ban jop na Shillong parliamentary constituency bad ong ba ki paidbah ka Ri-lum Khasi bad Jaintia kila thrang palat ia ka jingkylla.
Haba iakren bad ki lad pathai khubor hadien ba dep thep vote, u Dr Syngkon ula ong ba ka VPP ka ieng na ka bynta ka jingkylla bad kane ka dei ka jingsdang jong ka jingkylla. Kat kum ka jingong jong u, ha kano kano ka jingialehkai, kan don beit ka jingiakhun lem kumta ka jingialehkai kan nym long kaba sngewtynnad.
“Ki paidbah kila thrang bha ia kum kane ka sain hima sima la slem bha hapoh ka Jylla. Kumta ngi sngew skhem ba ngin jop ha kane ka elekshon” ula ong.
Haba kylli, u Dr Syngkon ula ong “Dei namar kata ngi la ioh phone call na ki briew bad kila sdang ban ieng lain naduh ka por 4 baje mynstep”.
“Kumta haba iadei bad ki jaka nongkyndong bad jaka sor, ka dei kaba ki paidbah kila khmih lynti bha bad ngi kum ka party ngin ialam lynti ha kaban wanrah ia ka jingkylla hapoh ka Jylla” ula bynrap.
