Shillong, Naitung 13 : U Symbud Myntri Rangbah ka Jylla ba khmih ia ka District Council Affairs (DCA) Bah Prestone Tynsong, ula pyntip ba ki riewshemphang na ka Panchayati Raj Ministry lem bad ka Tnad Community & Rural Development (C&RD) kin sa iarap ia ki lai tylli ki Autonomous District Council-KHADC, JHADC bad GHADC ba kin shna iala ki jong ki portal kumba kwah da ka Sorkar India.
Hadien ba pyniaid ia ka jingialang bad ki CEM jong ki lai ADC hynne ka sngi Palei, u Bah Prestone ula ong “Ngi la shim ia ka rai bad la kumno kumno ruh hapoh ka taiew ban wan, kine ki riewshemphang na ka Ministry bad ka tnad C&RD kin sa leit sha ki lai ADC ban iarap ia ki kumno ba kin shna iala ki portal kumba kwah daka Sorkar India”.
Ula ong ba kane ka kam ka dei kaba don jingiadei bad ka jingai jingmut jong ka 15th Finance Commission ban pyntreikam ia ki skhim bapher bapher da kine ki lai tylli ki District Council ka Jylla.
Kat kum ka jingong jong u, kat kum ki kyndon na ka Ministry, khlem ka portal, yn ym lah ban pyllait ia ka song pisa sha ki lai tylli ki ADC. Ki ADC kin hap ban thep ia ki kyrteng jong baroh ki shnong ha ka portal.
Hynrei, ka rai ban iarap ia ki ADC la shim hadien ba kila iakynduh ia ka jingeh namar ba kim lah ban plie ia ka portal. Kumta mynta, ki riewshemphang kin pynlut por shisngi ha kawei na kine ki lai ADC ban iarap ia ki kumno ba kin shna iala ka jong ka portal, ong u Bah Prestone.
Pule lang ia kane: Pynjynsur ka DC ia ka hukum khang dukan miet haduh ka por 11:30 baje
