Shillong, Lber 27 : U Myntri ka Tnad Pule Puthi Rakkam A Sangma hynne ka sngi Nyngkong, ula pyntip ba ka Sorkar kan sa thaw noh ia ka State Education Commission hapoh ka shibnai.
“Ka Search Committee kala nang pyniaid ia ka kam…Kan long kaba eh ban buh ia ka por hynrei kaba slem eh kan long hapoh shibnai (ban sa thaw),” ong u Rakkam haba jubab ia ka jingkyllibynrap bala wanrah da u MLA ka VPP na Nongkrem Bah Ardent M Basaiawmoit hapoh ka Iingdorbar.
Ula pyntip ba ka Education Commission kan don ia ka kynhun ki Nongtrei ba kynthup ia ki Stad ki Jhad ha ka liang ka pule dangle, kynthup ruh ki Academician bad ki Expert na ka Management bad ka Educational Planning.
U Myntri ula ong ba ka jingthmu ba kongsan eh jong ka Education Commission ka long ban ai jingmut ia ka Sorkar Meghalaya halor ki kam ba iadei bad ka rukom siew tulop jong ki skul, ki rukom pyniaid ia ki skul, ka jingdon ki bor pyniaid skul bad kumjuh ruh ia ka jingtreikam haba shit haba shai.
Haba kdew ruh ia ka bynta bad ka kamram jong ka Commission, u Rakkam ula ong ba kane ka Commission kan khmih ruh ia ki kam kiba ktah eh ia ka kam pule dangle ha Meghalaya haba iadei bad ka jingpyniaid ia ki skul ba iarap ka sorkar, ka jinglah shakri jong ki, ka jingtreikam bad jingshai jong ki SMC bad kiwei kiwei.
Ka Commission kan khmih ruh ia ka jingwanrah ia ki kyndon treikam ki ban pynthikna ia ka jingsiew ba mar katjuh haba iadei bad ka tulop jong ki Nonghikai ha ki kyrdan ai jingiarap bapher bapher, kaba iadei bad ki nonghikai ka Sorkar.
Kan ai jingmut ia ka Sorkar ia ka sienjam ba shakhmat halor ka kam ba iadei bad ki nonghikai Samagra Shiksha Abhiyan, ka jingpynkhlain ia ka jingi jingshakri jong ki skul khamtam ki skul ki bym lah treikam, ki skul ba mih tam, ki skul ba duna khynnah, ki skul ba tang iwei I nonghikai bad ki jingeh ba iadei bad ka jingbym ioh ia ki nonghikai ba hikai ha ki ktien bapher bapher khamtam ha ki jaka khappud, bad kiwei kiwei”.
Pule lang ia kane: Pat pynlut ka Sorkar ia ka pisa iakhun Covid-19, pynshai ka Myntri ha Iingdorbar
