Shillong, Lber 27 : U MLA ka Liang Pyrshah Bah Ronnie V Lyngdoh hynne ka sngi Nyngkong, ula kyntu iaka sorkar ba kan pyrkhing ia ki kali shipai ban pyndonkam ia ki kor pynsawa kali (horn) kiba long palat pud hapoh ka nongbah Shillong.
U Bah Lyngdoh ula ong ka jingsawa jam palat kala ktah iaka koit ka khiah jong ki paidbah.
Ula kyntu iaka tnad Transport ba kan pynthikna ha ka ban pyndonkam ia ki kyndon ain ba mana ban pyndonkam ia ki jingpynsawa horn kiba sawa jam ha ka thain Upper Shillong khamtam haba ki kali heh ki iaid na katei ka thain bad kila pynthud iaka thiah ka dem jong ki paidbah kiba sah ha katei ka thain.
Une u MLA ula kynnoh ruh ba ki kali jong ki shipai ki pyndonkam da ki jingpynsawa kiba khlain kiba long palat pud.
Pule lang ia kane: Mang ka Sorkar T. 19 klur duna ban pynheh ia ka Nongrah WSS hapoh ka JJM
U Bah Lyngdoh ula kyntu iaka tnad sorkar ba kan tehlakam ia ki briew ha kaban khura ne pynwandur da kumwei pat ia ki Silencer jong ki kali bad ki don ruh ki samla kila pynlong iaki surok ha Upper Shillong kum ka jaka ialeh race.
U Symbud Myntri Rangbah u Bah Sniawbhalang Dhar uba khmih iaka tnad Transport haba jubab ula ong, ba ka tnad kala iohpdiang ia ki jingujor halor katei la mat bad ki ophisar kila mih ban khmih ia katei ka kam.
Ula ong, kiba pynkhein iaki kyndon ain kila shah dain kuna bad kila kurup noh ruh ia ki jingpynsawa kiba sawa jam bad ula iathuh ba ha u snem 2021-2022 la rejistar 73 tylli ki case.
U Myntri Sorkar ula iathuh ba ka tnad sorkar ka dang pyrshang katba lah ban khmih bniah iaka jingpynkylla ia ki Silencer.
