Shillong, Lber 27 : U Myntri ka Tnad Public Health Engineering (PHE) Marcuise N Marak hynne ka sngi Nyngkong, ula pyntip ba ka Sorkar Jylla kala dep mang haduh T. 18.87 klur ka song pisa ha u bnai Naiwieng, 2022 ban shna pynheh (augmentation) ia ka Nongrah Water Supply Scheme na ka skhim Jal Jeevan Mission (JJM).
Haba jubab ia ka jingkylli bala wanrah da u MLA ka AITC na Nongthymmai Bah Charles Pyngrope, u Marcuise ula ong ba ka Mission kala don ha ki kyrdan bapher bapher ha ka jingpyntreikam.
U Myntri ula pyntip ba ia ka Nongrah Water Supply Scheme la dep ban pyntrei ha u bnai Nohprah jong u snem bala lah.
Pule lang ia kane: Dawa ka VPP ban pynshitom ia kiba ak ‘VIP’ bad tah iit iong ha ki kali
U iathuh ba ia kane ka project la mang ha ka 31 tarik Lber 2017 bad la buhpor ban pyndep ha u Lber 2022. Ka pisa baroh bala mang ia ka project ka long T. 5.92 klur. Ki Nongshongshnong kiba la khmih lynti ban ioh jingmyntoi hadien ba pyndep ia ka project kin kot haduh 12,021 ngut.
U Marcuise u pyntip ba ia kane ka skhim la mang pusa ha u snem 2017 shuwa ban pyntreikam ia ka JJM bad namar kata, ka kyndon ban pynpoi kor ha ki thliew Iing kam shym la don satia ha ka skhim.
Hynrei, ka jingpynpoi kor um ha Iing briew kan sa don mynta da ka jingpynheh ia ka Nongrah Water Supply Scheme dang shen ia kaba la mang pisa na ka JJM, ula ong.
