Itanagar, Lber 27 : Arngut ki dkhot jong ka kynhun kieng atiar National Socialist Council of Nagaland (Khaplang) NSCN-K ki la lait phet napoh ka phatok ha Khonsa hapoh Tirap district ka Arunachal Pradesh hadien ba ki la pyniap ia uwei u pulit bad pynmynsaw ia uwei pat.
Kine ki lehnoh la ong ba ki la poi sha ka jingiakynad bad ki arngut ki pulit langrut kiba la pyrshang ban khanglad ia ki ba kin ioh phet.Kine ki pulit ki la ngat ha ka jingmynsaw kaba jur ha kane ka jingialeh markylliang ha kaba uwei na ki ia uba la tip kyrteng kum u Wangnyien Bosai u la khlad noh ha ka lynti ban leit sha ka jaka sumar hapoh Assam Medical College and Hospital (AMCH), Dibrugarh.La ong ba utei uwei pat uba la mynsaw ruh u la donhapdeng ka jingshitom kaba jur.
Katkum ki tyllong khubor la ong ba ia kine ki arngut ki dkhot ka NSCN (K) la tip kyrteng kum u Rocksen Homchha bad u Tipu Kitnya ki la poi sha ka jingiakynad bad kitei ki arngut ki pulit langrut kiba ap pahara ha katei ka phatok ha katei ka por ba katei ka jingjia ka la wan jia.
Kitei ki arngut ki lenoh la ong ba ki la knieh ia ki suloi na kitei ki arngut ki nongap phatok bad hadien ba ki la ioh ban pynjem khnap ki la phet krad noh na katei ka jaka. Kane ka jingjia kam dei satia ka sien lait phet phatok kaba nyngkong ka ban jia ha Arunachal Pradesh, ha kaba ki la don ki lehnoh kiba la lait phet napoh ka phatok ha kiba kum kine ki juh ki runar ha ki snem kiba la dep.
Na ka liang ki bor pulit ka Tirap ki la pynlong ka jingthwet kaba jur ban ioh kem ia kitei ki arngut ki lehnoh da ka jingiarap lang ki bor shipai ka Assam Rifles bad CRPF.
“Ngi la pynlong ka jingthwet kaba jur ban ioh kem ia kitei ki lehnoh kiba la laitphet napoh ka phatok.Ka jingkhynra hapoh ki shnong ki thaw ka la iaid shakhmat,” ong u heh pulit.
