Shillong, Lber 27 : U Nongialam ka Liang Pyrshah Voice of the People Party (VPP) Bah Ardent M Basaiawmoit, hynne ka sngi nyngkong, ula dawa ban pynshitom ia kito ki briew kiba ak ialade kum ki ‘VIP’ da kaba tah iit iong ha ki kali.
Haba wanrah ia kane ka mat ha ka kynta kylli jingkylli ha Iingdorbar,u Bah Ardent ula ong ba kila don bun bah ki briew kiba ak ialade kum ki VIP. Ula kynnoh ba kine ki briew kila tah iit iong bad ha ki katto katne ki khep ki dei ki paralok, bahaiing ne ki ba iatreilang bad ki briew kiba don ha ka bor.
Haba kwah ban tip ia ki sienjan ban shim pyrshah ia kine ki nongpynkhein ain, une u MLA ka Nongkrem ula ong ba ka Iingkashari Supreme Court ha ka 27 tarik Iaiong, 2012, kala khang pyrshah ban tah iit iong ha ki kali palat ia u pud bala shah kat kum ka Motor Vehicle Act, haba ong baka jingpyndonkam ia ka iit iong ka dei kaba ktah ia ka imlang sahlang bad iarap ia ki nongleh bymman ban rieh na ki kti jong ka ain.
Ka Iingkashari ki lai ngut ki Nongbishar bala khlieh da u Chief Justice SH Kapadia kala ong ba ki kompani (manufacturer) ki lah ban pynmih ia ki kali bad ki iit iong hapoh u pud jong ka visual light Transmission (VLT) ba long 70% na ka Iitkhmat bad Iit nadien ba 40 % ki iit na ki jingkhang.
Ka Iingkashari kala bthah ia u Home Secretary bad kumjuh ruh ia ki Khliehduh jong ki Pulit ha ki Jylla ka Ri ban pynthikna ia ka jingpyntreikam pyrrkhing ia kane ka hukum, kaba lah pyntreikam naduh ka 4 tarik Jymmang, 2012.
U Bah Ardent ula ong ba ka Iingkashari kala ong ruh “Ka jingpyndonkam ia kine ki film iong la pynshisha ba ka long ka paradise ki riew bymman bad ki kam ba ktah ia ka imlang sahlang. Kane khlem pep ka iarap ia ki nongleh bymman ban rieh na ki khmat ki Pulit bad pynshlur ban leh ia ki kam pyntriem kum ka jingiuhroit ia ka longryngieng ki kynthei, kam tuh kam rahbor bad kiwei”.
Haba jubab, u Myntri Rangbah ka Jylla Conrad K Sangma ula kular ia ka Iingdorbar ba ka Sorkar kan sa shimkhia mardor ia kane ka kam haba ka ioh pdiang ia kano kano ka jingujor. “Wat ha ka kali jong nga ruh, ngam shym la pyndonkam ia ki iit iong” ula ong.
Ki don haduh 103 tylli ki kali VIP ha ki kyrdan bapher bapher ba kynthup ia 2 tylli kiba hap hapoh ka Z+ category, 10 tylli ki Z category, 19 tylli ki Y category bad 72 tylli ki X category.
Hynrei u Conrad ula ong ba ka hok ban ioh jingiada ia ka jingshngain jong kine ki briew ka long kat kum ka “Yellow Book”, ka kot barieh bha (secret document) na ka bynta ka jingai jingiada bad bynrap “Namar kata, la pyrrkhing ia nga ban ai shibun ki jingtip halor ka “Yellow Book”.
Pule lang ia kane: Duna ka Meghalaya haduh 150 ngut ki Doktor Specialist, pyntip ka Myntri
