Shillong, Lber 27 : Ka Jylla Meghalaya ka dang duna sa 150 ngut ki doktor Specialist ia kaba ka Myntri ka Tnad ka Koit ka Khiah Kong Ampareen Lyngdoh kala niew kum ka kam kaba sngewkhia eh jong ka Sorkar.
Haba jubab hapoh ka Iingdorbar, I Kong Ampareen ila pyntip baka Jylla ka mang ban don ia ki doktor Specialist haduh 375 ngut hynrei mynta ki don tang 227 ngut.
I iathuh ba ha ka jingthungkam ba khatduh jong ka Medical Recruitment Board, kumba 397 ngut ki Doktor la thungkam ha Jylla ha kaba tang 83 ngut ki dei ki Doktor Specialist.
“Hynrei, ka dang don ka jingduna ba 150 ngut ki doktor Specialist ha ka Jylla kaba dei ka kam ba sngewkhia bha” ong I Kong Ampareen haba kular hapoh ka Iingdorbar ba ka Sorkar kala smimkhia ban khmih kyrkieh ia kane ka kam.
Halor ka jingkyrpad jong u MLA ka UDP na Nongpoh Bah Mayralborn Syiem ban buh ia ka Medical College ha Ri-Bhoi, kaba dei ka Aspirational District ha ka Jylla, ka Myntri kala ong ba kane ka jingtyrwa ka dang don ha ka jingshong bishar da ka Sorkar.
I Kong Ampareen ila pyntip ruh ba ka Sorkar ka don jingthmu ban nang pynkha bun ki jaka sumar kum ki PHC, Sub Centre da kaba mang kham bun ka pisa ban pyndonkam.
Pule lang ia kane: Kem ki Pulit Ri-Bhoi ia 3 ngut ki snar khaii droks, kurup palat 140 gram u heroin
