Shillong, Lber 27 : Ka Myntri ka koit ka khiah Kong Ampareen Lyngdoh hynne ka sngi Nyngkong kala ong ba ka song pisa ba iadei bad ka khlam Covid-19, ia kaba la pynsngewthuh bakla ba ka jah rngai, ka dei ka bym pat pynlut satia bad ia kane ka pisa yn sa pyllait kat kum ka jingiaid ka jingtrei jong ki kam bala ai ban pyntrei.
I kong Ampareen ila pyntip ia kane haba jubab ia ka zero hour notice bala wanrah da u MLA ka VPP na North Shillong Bah Adelbert Nongrum halor ka RTI bala pan da u Bah Disparsing Rani, kaba kynnoh jah rngai haduh T. 43 klur ka pisa bala mang ban iakhun ia ka khlam Covid hapoh ka Jylla.
I Kong Ampareen ila pyntip ba ha ka por ba lynshop ka khlam, ka Sorkar India lyngba ka Ministry of Health & Family Welfare kala wanrah ia ka song pisa Emergency Covid Response Package ban kyrshan ia ki Jylla ha ka jingiakhun pyrshah ia ka Covid.
Ia kane ka song pisa la ai ia ka Meghalaya ha ki ar bynta kata ka ECRP Phase I bad ka ECRP Phase-II. Ia kane la bei lyngba ka National Health Mission.
I iathuh ba ka ECRP Phase-I ka dei kaba la mang 100% da ka Sorkar Pdeng katba ka ECRP-II ka dei kaba la mang 90 la 10 hapdeng ka Sorkar Pdeng bad ka Jylla. Ka ECRP-I ka dei jong u snem 2020-21 bad ka ECRP-II ka dei jong u 2021-2022.
Pule lang ia kane: Lap ki paidbah ia ka kjat u rangbah hajan IIM
I Myntri ila pynshai baka jingkylli bala wanrah ha ka sien ba khatduh ha IIngdorbar kata ha ka Dorbar Synrai u 2022, ka long ba ka song pisa bala pynlut ka dei na ka Sorkar Pdeng bad Sorkar Jylla kumjuh. Namar kata, ka jubab bala ai ka ong ba T. 76.56 klur hapoh ka Iingdorbar.
Ila kdew ruh ba ka RTI sha ka Ministry ka Sorkar Pdeng, kala pan ia ka song pisa bala mang ia kaba ka jubab bala ai ka long ba kat haduh ka 20 tarik Kyllalyngkot, 2023, ka long T. 104.12 klur.
“Nga kwah ban kdew hangne ba ka song pisa bala kdew ha ka RTI ka dei kaba dei hynrei, ka jubab bala ai ha ka Dorbar Synrai ka long halor ka pisa bala dep ban pynlut” ong I kong Ampareen.
I Myntri ila pyntip ruh ba shibun ki kam la pyntrei na ka ECRP-II kiba dang iaid haduh mynta. Nalor kata, ka jingmang ia kawei na ki kam ba heh bha jong ka song kata ka Critical Care Block kaba kot haduh T. 21.38 klur ,la ai kham hadien ia kiwei kiwei ki kam. Ka jingpyntrei ia kane ka kam ka dang shu sdang bad kam pat don satia ka jingpynlut ia ka pisa.
“Namar kata, ka pisa bala iasngewthuh bakla ba ka jah rngai ka dei ka bym pat pyndep bad yn sa pyllait ia ka kat kum ka jingiaid ka kam bala pyntrei” ong I kong Ampareen.
