SHILLONG, JYLLIEW 27: U Myntri Rangbah ka jylla u Conrad Kongkal Sangma hynne ka 27 tarik u Jylliew, u la ong ba ka sorkar jylla ka dang donkam bun ka song pisa ban maramot ne pynbha ia ki jingtei kiba la shah pynjulor naka jingtwa khyndew, jingshlei um bad ka jingther u lapbah lapsan haka jylla.
“Hadien ba la sakhi iaka jingjur jongka jingshah pynjulor haka bor mariang, ngi la sngewthuh shai ba ngi donkam ban ioh bun shuh shuh ia ka bhah tyngka ban ia kaba ngi la antad ban donkam kumba T.300 Klur” ong u Conrad Sangma haba iakren bad ki nongthoh khubor.
“Ha ka jingiakynduh ka jong nga ia u Myntri Kam Pohiing ka ri u Amit Shah, u la iathuh ia nga ba yn sa phah iaka kynhun jong ka sorkar pdeng ban wan lum ia ki jingtip kiba thikna bad nga sngewkmen ba u la bthah ban leh kumtei. U la bthah ruh ia nga, ban leit jurip ia ki shnong ki thaw kiba la shah ktah jur ha ka bor mariang bad haba nga la leit shakitei ki jaka, nga la sakhi da la ki jong ki khmat ba ka jingjulor ka long kaei kaei kaba ym lah ban mutdur” ong u Myntri Rangbah ka jylla.
U la ong, ba u la pyntip iaka Ministry of Home Affairs ba katba ki dang ap ban wan lum jingkheiñ ka kynhun jong ka sorkar pdeng, u la bthah iaka tnad sorkar ba kin leit khmih iaka jinglong jingman bad ban maramot mardor ia ki bynta kiba ka sorkar kan ym donkam iaka jingiarap naka sorkar pdeng.
