Shillong, Nailar 05: U Symbud Myntri Rangbah uba dei ruh u Chairman ka West Jaiñtia Hills Regional Committee u Bah Sniawbhalang Dhar u la ong ba ka Jylla Meghalaya ka la pynkhreh na ka bynta ka jingïakren pynbeit pud haka wat ba ar hynrei ka dang ap pat ïa ka Assam ba kan thung ïa u chairman jong ka Regional Committee.
“Ngi dang ap ia ka Assam ba kan pyntip sha ngi mano ban long u chairman na ka liang jong ki. Tang mar ia thung ia u chairman jong ka regional committee, nga tharai ngin sa ia kynduh,” la ong u Bah Sniawbhalang.
Halor ki kaiphod na ka bynta ki shnong kiba hap hapoh ka Block I, u Bah Sniawbhalang u la ong ba baroh ar tylli ki Jylla ki dang don ha ka jingpynkhreh iala ki kaiphod shwa ban aiti shala ki Sorkar Jylla.
“Ngi la pynkhreh. Hap ban aiti ïa ki kaiphod na baroh ar tylli ki Jylla. Ngan ym ong ba ka long kaba eh, hynrei namar ba ki bynta ba sah ki dang donkam ban iakren, ngin sa ia peit ia kata” u la ong.
U la kdew ba ia kane ka mat la buh hakhmat ka Joint Committee ba la thaw da ki ar tylli ki Sorkar.
“Ngi la phah ia kane ka sobjek sha ki Committee jong baroh ar tylli ki Sorkar Jylla. Dei na kata ka daw ba ka Committee ka don bor ban shim rai halor ki kam khappud,” ula ong.
Haba kylli halor ka jingdawa ban pynphai biang ia ka Block I sha ka jylla Meghalaya, u Symbud Myntri Rangbah ula ong ba ka Meghalaya ka la jan pyndep ia ka jingwad bniah halor kane ka bynta.
“Ngi la leh ia kano kano ka kam wad bniah na ka liang jong ngi. Ki ophisar ki la jan dep. Ynda la dep baroh ki kaiphod, ngin sa shong jingialang shwa bad nangta ngin sa pyntip sha ka Assam. Ynda ki la thaw ia ka Committee jong ki, baroh ar tylli ki Committee kin shong bad kin shim ia ka rai” u la ong.
Halor ki jingkylli ha kaba iadei bad ki shnong ba bun paid ki Khasi-Pnar ha katei ka jaka ba don jingiakajia, u Bah Sniawbhalang u la ong ba ka thup jingtip ki don ha ki bor district.
“Ka thup jingtip ka don bad u DC ha kaba iadei bad ki jaka iakajia” u la ong.
