Shillong, Jylliew 20: U Chief Executive Member ka Khasi Hill Autonomous District Council (KHADC) Bah Titosstarwell Chyne ha ka sngi nyngkong ula pyntip ba ka Council kala dep phah naduh u bnai Iaiong ia ka jubab halor ka jingpan jingpynshai jong ka Ophis u Comptroller and Auditor General ka India ba iadei bad ka jingkheiñ jingdiah jong ka Council (Account).
“Ka audit report jong ka CAG kaba ngi ioh khatduh eh ka dei ha u snem 2012 – 2013. Ngi la dep ruh ban rah ha ka Dorbar ha ka sien shong kaba dang shu dep bad ngi la iatai ia ki jingkhein jingdiah jong ngi ba la dep ban audit haduh ka snem 2013,” ong u CEM da kaba bynrap ba kane ka mut ba naduh u snem 2013 ka Ophis u CAG ka dang iai audit ia ki jingkheiñ jingdiah jong ka Council na ka snem sha ka snem.
U CEM ula ong “Ki don ki jingkhein jingdiah ki bym pat lah ban pynbiang kumba la kdew ia ka daw ba kim biang ki Utilisation Certificate (UC)”.
“Hynrei ha kine ki ar snem ba la dep na ka daw jong ka khlam Covid, ngi khlem lah ban pyniaid ia ka audit…. phi la sngewthuh hi haba don ka khlam ym lah ban ia shong ne treikam bad kane ka la pynthut ia ka jingtreikam” ula bynrap.
Halor ka jingsuba ba don ka jingpyndonkam bakla ia ka pisa, u CEM ula ong “Ban ong ba kan don kano kano ka jingpyndonkam bakla ia ka pisa, kata hi kam don, ka shu long ba ngim pat lah ban audit lut ia ka jingkhein jingdiah naduh u snem 2013 haduh kane ka snem treikam kaba mynta”.
U CEM u ong ruh ba u la ai jingmut ban thung da ka internal inquiry ka ban tohkit bniah ia ki jingkhein jingdiah ba kan ym don kano kano ka jingbakla ha ki jingkhein jingdiah.
