Shillong, Jylliew 20: Ka Election Commission ka Ri India (ECI) hynne ka sngi nyngkong, kala rai ban pyndam noh haduh 111 tylli ki Political Party bala register hynrei ki bym pat ioh jingithuh ne ki Registered Unrecognized Political Party (RUPP) na ka Register jong ka.
Ka kyrwoh bala phah da u Joint Director ka ECI (Media) Anuj Chandak, kala ong ba ka ECI kala bteng ban pyndam noh ia ki Political Party bala register hynrei ki bym pat ioh jingithuh ban pynthikna ba kin iaid kat kum ki kyndon bala buh. U pyntip ba haduh 111 tylli ki party la rai ban pyndam noh na ka Register bad ka Symbol Order 1986.
Ka ECI kala pynmih ia ka hukum ha ka 25 tarik Jymmang 2022 ban pyndam noh ia ki RUPP ban pynthikna ia ka jingiaid kat kum ki kyndon hadien ba ka Commission kala pynlong ia ka jingialang hapoh ka jingpyniaid jong u Chief Election Commissioner u Rajiv Kumar lem bad u Election Commissioner u Anup Chandra Pandey.
Ha kane ka hukum, la bthah ia ki Chief Election Officer ba kin shim ia ka sienjam ha kaban pyntreikam ia ka hukum da ki RUPP kat kum ka kyndon 29A bad 29C jong ka RP Act 1951.
“Kum ka jingbuddien ia ka rai ba 25 tarik Jymmang ban pyndam noh ia ki 87 tylli ki RUPP rngai, ha ka kylla kaba ar jong kane ka sienjam, ka Commission kala rai ban pyndam sa ia ki 111 tylli ki RUPP na ka Register” ong ka kyrwoh.
Ki CEO kila pyntip ba kine ki RUPP ki dei ki bym lapdien satia shano ba ki don bad shem ba ki la kylla party rngai hadien ka jingpynthikna lyngba ki shithi bala phah sha ki kat kum ka hukum jong ka Commission ba 25 tarik Jymmang namar ia baroh ki shithi la pynphai pat da ka Tnad Postal ki bym lap satia ia ki jaka ba ki treikam.
Ka kyrwoh ka ong ba la Commission kala rai ruh ba lada don ki political party kiba don jingpyrshah ia kane, ki lah ban iakren bad ki Chief Electoral Officer/ Election Commission tang hapoh ka 30 sngi ba pynmih ia kane ka hukum ryngkat bad ka sakhi ba ki dang treikam, ban aiti ia ki audit accounts, ka kaiphod halor ka jingpynlut pynsep, ka jingpynthymmai ia ki nongkitkam ryngkat ka bank account bad kiwei kiwei.
