Shillong, Risaw 21: U Myntri kam Pohiing Ma Lahkmen Rymbui hynnin ka sngi palei ula ong ba ka Sorkar kala dep pan jingpynshai na u Assistant Inspector General of Police (AIGP) barim Bah GK Iangrai halor ka jingkynnoh donkti ha ka jyrsieh thied kali hapoh ka Tnad Pulit.
“Ka sorkar kala dep pan jingpynshai kat kum ki rule halor kane ka case” ong u ma Rymbui haba iakren bad ki nongthoh khubor.
Ula pyntip ba ia ka Article of Charge lah dep ban aiti bad mynta ka Disciplinary Committee kan sa khmih ia baroh ki liang.
“Hadien ba kila pyndep, lada lah pynshisha, ngin sa leh eiei pyrshah ia u AIG barim. Ngim kwah ban buhrieh ia kaei kaei ruh. To ngin ap bad peit”, ong u ma Rymbui.
Haba kylli, u Myntri ula ong “Ngim don eiei ban buhrieh bad kaei kaban jia to ngin kyrmen ba kan jia na ka bynta ka jingbha khnang ba kino kino kiba kwah pynkhun ia ka ain kin tip ba kam don jaka ia ki ban rieh”.
“Ia ka Article of Charge lah dep ban pynwan bad u Ophisar ba donkti un hap ban jubab pyrshah ia baroh ki jingkhnnoh.. Hadien kane kaei kaba dei ban leh kan sa iaid nadien” ula bynrap.
