SHILLONG, Risaw 21: Ki pulit ka Sadar Police Station hynne ka sngi ka 21 tarik Risaw ki la ujor kylla da ka ejahar pyrshah ia ki nonghikai kontrak kiba pynlong ka jingiaid paidbah na Mot Kiang Nangbah sha khyrdop Secretariat haka 6 tarik mynta u bnai.
Naka liang u president ka Meghalaya president of the Meghalaya Government Lower Primary School Contractual Teachers’ Association (MGLPSCTA) u bah Birbor Riangtem ula ithuh ba ki pulit kila ujor ejahar pyrshah iaki nonghikai da kaba kdew ba kila pynkheiñ ia ka kyndon 144 crpc.
Lah ban kdew ba ki nonghikai kontrak kiba la shah wengkam kila pynlong ka jingiaid paidbah sha Secretariat bad naka liang ki pulit kila pyndonkam daki bom sat khmat wat hapdeng ka jingdon lang ki nonghikai riew kynthei ba armet bad ki khynnah.
Haba kren sha ki lad pathai khubor u bah Birbor ula iathuh ba mynta ka sngi ki nonghikai kila shah khot hajir ha Sadar Thanat naka bynta ban kylli pyrthuh haba iadei bad ka jingjia haka 6 tarik Risaw.
U bah Birbor ula iathuh ba ki pulit ki la kynnoh kylla ba dei ki nonghikai kiba wan lam ia ka jingkulmar da kaba ki la pynkheiñ ia ka kyndon 144 crpc bad ki pulit ki la ong ba jyn lada ki nonghikai kim tur sha secretariat da ka bor, ki pulit ruh ki nym sdang ban pyni bor.
“Ki pulit kila kynnoh ruh ba ka jingpyndonkam bom sat khmat kadei namar ba ki nonghikai kila khot bad ialam lang ia ki sengbhalang bad kala mih ka jingiahuri hura da kaba kynnoh ba ki don katto katne ngut kiba la sdang ban pyni bor ia ki pulit ha katei ka sngi” la ong u bah Birbor.
