Shillong, Risaw 20 : U Nongialam barim ka Congress bad General Secretary barim ka KSU Bah Auguster Jyrwa hynne ka sngi palei, ula pyniasoh ialade sha ka UDP ha ryngkat ki Nongkyrshan.
Ia une u Nongialam bad ka kynhun jong u, la pdiang sngewbha da u President ka UDP Bah Metbah Lyngdoh ha ka jingia lang kaba la pynlong da ka UDP Shillong City ha Dinan Hall, Jaiaw.
Kiba la iadonlang ha kane ka jingialang ki kynthup ia u Myntri Sorkar ma Kyrmen Shylla, General Secretary ka UDP Dr Jemino Mawthoh bad kyrtong ka UDP na West Shillong bad North Shillong Bah Paul Lyngdoh bad Dr Aman War.
Ha ka jingkren, u Bah Auguster ula ong ba watla ha ki snem bala leit ula don bad ka Congress hynrei ka mynsiem jong u ka iai don beit bad ka UDP naba ka dei ka seng riewlum kaba heh duh ha ka Jylla kaba u paidbah u phaikhmat ban ioh ia ka jingsynshar kaba bha.
“Nga la shim ia ka rai ban pyniasoh sha ka UDP hadien ka jingiasyllok bad baroh ki bahaiing hasem” ula ong haba bynrap ba ki bahaiing basem ki don ka jingiadei ba iajan bha bad ka party UDP.
Haba ai khublei ia ka West bad North Shillong Circle jong ka UDP kaba pdiang ia u sha ka iing ka sem jong ki, u Bah Auguster ula ong ba da ka jingiasoh jong u kan nang pynkhlain shuh shuh ia ka party sha ka elekshon MLA 2023.
U Bah Auguster u dei u kyrtong ka Congress uba shah rem ha ka elekshon MDC 2019 pyrshah ia u Bah Paul Lyngdoh.
Ula ong ba mynta ula ioh ia ka kabu ban iatreilang bad u Bah Paul bad Dr Aman War ban shakri ia ki paidbah jong ka North bad West Shillong Constituency bad ka Jylla baroh kawei
Ula bynrao ba naduh ki sngi ba u dang don ha ka KSU ula ju ban jur ban iada ia ka bha ka miat jong ki paidbah bad ka Jylla baroh kawei, namar kata, u don ka jingkwah ban rung noh ha ka UDP kaba dei ka seng riewlum ba khlain ha ka Jylla.
“Mynta ki sngi, baroh ki don ia ka jingkyrmen ha ka UDP namar kila sngewbha baka Party ka don ia ka nongrim kaba khlain khamtam haba phai sha ka jingiada ia ka bha ka miat ki paidbah b aka Jylla.Namar kata, kan dei ka kamram jong baroh ban trei shitom bad ban pynthikna ba ka UDP kan thaw lane ialam ia ka sorkar ha u 2023” ula bynrap.
