Shillong, Naitung 01: Ka Maitshaphrang Movement hynne ka sngi thohdieng kala kyrpad ia u Lamphang ka Iingdorbar Thaw Ain ka Jylla bah Metbah Lyngdoh ba un tukar lang ha kaban pynthikna ba ka Phan Nonglait kan ioh noh ia ka jingithuh kum ka Nongiakhun laitluid na ki kynthei Khasi hapoh ka Jylla bad ha ka Ri baroh kawei.
Haba iakren bad ki nongthoh khubor, u Bah Micheal Syiem Convener ka Maitshaphrang Movement kala ong ba dang shen, u Nongiasaid ain ka Supreme Court Bah Danielstone L Nonglait ula pyllait ia ka kot “Ka Phan Nonglait” kaba la pynshong nongrim na ki kot ki sla bala lum na ki thup jingthoh ka Ri Bilat kiba iadei bad ka jingnoh synniang jong kane ka khla Wait sha ka jingiakhun laitluid ka Ri India na ka Sorkar Bilat.
“Ngi sngew baka por kala dei ban pynim ia ka kyrteng jong kane ka riewshlur da kaba ithuh noh ia ka kum ka Kynthei Khasi ba nyngkong kaba dei ka nongiakhun laitluid jong ka Ri” ong u bah Micheal.
U Bah Micheal u pyntip ba ula aiti ia ka shithi sah u Lamphang ka Iingdorbar ba kyrpad ia u ban iakren lem ia kane ka kam bad ka Sorkar Jylla ba kan buddien lem sha ka Sorkar India.
U Bah Micheal ula bynrap ba ka Phan Nonglait ka dei kaba don bynta ruh ha ka jingpyniap ia ki 32 ngut ki shipai Bilat ha ka thma Khasi-Bilat bad namar kata, ym dei ban phai lyndet ia kane ka synniang jong ka bad ka dei ban ioh ia ka jingithuh da ka Sorkar India.
