Dawa ka HYC ban tohkit CBI halor ka jingtei ia ka Iingdorbar Thaw Ain ba thymmai ka Jylla

Date:

Share post:

Shillong, Naitung 01: Ka seng Hynniewtrep Youth Council (HYC) hynne ka sngi thohdieng, kala dawa ba dei ban phah tohkit ha ka Central Bureau of Investigation (CBI) halor ka jingkynnoh pynkiew ia ka mang tyngka (estimate cost) ban tei ia ka Iingdorbar Thaw Ain ba thymmai jong ka Jylla ha Mawdiangdiang.

Ka kynhun jong ki Nongialam ka HYC kala aiti da ka dorkhas ha u Lamphang ka Iingdorbar Thaw Ain Bah Metbah Lyngdoh, uba khlieh ruh ia ka High Powered Committee (HPC) ba un tuklar lang halor kane ka kam.

“Ngi dawa ia ka HPC ba kan ai jingmut ia ka Sorkar Jylla ba kan thung ia ka jingtohkit ba laitluid, lada long kaba lah da ka Central Bureau of Investigation (CBI) halor ka jingkynnoh kam bym hok, ka jingbamklop ia ka pisa paidbah bad ka jingbamsap da ka jingpynkiew dor ia ka project khlem da iaid kat kum ki kyndon nalor ba dei ruh ban tynrong ia ka jingbah khlieh ha baroh ki briew ba donkti ha kane ka kam beain” ong u samla Roykupar Synrem, General Secretary ka HYC haba iakren bad ki nongthoh khubor.

Kat kum ka jingong jong u, ka Tnad PWD (Building) kala khot ia ka e-tender (NIT) ha ka 6/9/2018 ban tei ia ka Iingdorbar Thaw Ain ka Jylla ha ka jingmang tyngka ba kot T. 105,58,66,500.00 bad la buh por ban pyndep ia ka hapoh ka 36 bnai.

Ka HPC hapoh ka jingkhlieh u Lamphang kum u Chairman, ha ka jingialang ba long ha ka 21 tarik Rymphang 2019, hadien ka jingiakren sani bha, kala mynjur ia ka rai jong ka PWD (Building) Departmental Tender Committee jong u 2018-2019 bala long ha ka 22 tarik Kyllalyngkot 2019, kaba la ai jingmut ban jied shuwa tang ia ka Uttar Pradesh Rajkiya Nirman Nigam Limited bad bthah ruh ia u Chief Engineer (Building) ban shim ia ka sienjam ha kaban plie noh ia ka jingthep kyrteng jong kiba thep tender.

U ong baka HPC kala shong jingialang biang ha ka 28 tarik Rymphang 2019, ha kaba la pyntip da u Chief Engineer ka PWD (Building) ba kat kum ka jingai jingmut, la plie ia ka kyrteng jong ka UPRNNL kaba buhdor T. 127,75,98,465.00, kaba long haduh 21% palat ia ka jingmang pisa jong ka project.

“Halor ka jingshah kylli ha ki dkhot ka HPC, u Chief Engineer PWD(Building) ula pyntip ba ka dor bala buh da ka UPRNNL ka dei kaba lah ban pdiang namar kine ki daw: Ia ka jingmang pisa la pynkhreh halor ka SOR (B) jong u snem 2015-2016 bad namar ba ka jingthep tender kala jia ha u snem 2018-2019, kaba long haduh laisnem duna, kala don ka jingiapher ha ka dor jong ki tiar ban tei ia kane ka project bad ruh ia ka bai bylla” ula ong.

U ong ba ka HPC kala ai jingmynjur ia kane ka jingai jingmut jong u Chief Engineer PWD ( Building) bad kala mynjur ban aiti ia ka kam sah ka UPRNNL da ka dor b aka buh kaba long 21% palat ia ka jingmang tyngka.

“Hynrei na ki jingtip bala ioh na ka Ophis u Chief Engineer PWD(B) bad ka Ophis u Executive Engineer ka PWD (B) Shillong Building Division, ba iadei bad ka jingtei ia ka Iingdorbar Thaw Ain, kala mih ka jingartatien ba ka don ka jingbym leh hok, ka jingbamklop ia ka pisa, ka jingbamsap da baroh ki kynhun/ka tnad bad ki Ophisar ba dei khmih” ula ong.

U Bah Synrem ula ong ba ka long kaba lyngngoh ba ka Ophis u Chief Engineer PWD(B) kam don jingtip la ka don ne em ka jingkiew dor namar haba kylli ia kane, ula phah ia ka jingpang jingtip lyngba ka RTI sha ka Ophis u Executive Engineer PWD (B) Shillong Division.

“Ka Ophis u EE kala jubab b aka don ka jingkiew dor ki mar ki mata bad ka project kala shongdor mynta haduh T. 177,78,17,000.00 ha kaba haduh T. 160,29,78,049.00 la dei ban pyllait sha ka Contractor” ula ong.

Une u Nongialam ka HYC ula ong ruh ba une u juh u Ophisar (EE ka PWD (Building) ula jubab ba ka dor nyngkong bala mynjur (original cost) ka long T. 141,14,84,000.00 kaba long khongpong ia ki jingtip bala ai da ka Ophis u Chief Engineer lyngba ka LOA bala pynmih bad ka jingbuh jingthoh jong ka HPC kaba pyni ba ka dor jong ka tender ka long T. 127,75,98,465.00.

“Mynta ka jingkylli kaba donkam ban hap jubab ka long ba kumno u EE ka PED(Building) u wanrah ia kane ka dor bala buh nyngkong haba ka LOA bala ai sha ka UPRNNL ka long tang T. 127,75,98,465.00?. Mano ba aibor ia u EE PWD (Building) ban pynkylla ia ka dor jong ka Tender n aka dor bala kdew ha ka LOA kaba ki ong ka Original Approved Cost” buh jingkylli une u Nongialam ka HYC.

Une u Nongialam ka HYC ula ong ba kane hi kadei kaba beain namar la shai ba ka trai jong ka project ka dei ka Meghalaya Legislaive Assembly bad ka PWD Building ka dei tang ka nongpyntrei ia ka kam na ka bynta ka Assembly.

Share post:

spot_img

Popular

More like this
Related

Hukum ka Iingkashari ia ka Sorkar ban bud ia ki kyndon ban wanrah jingkhuid ha pung Umiam

Shillong, Rymphang 24 : Ka Iingkashari Meghalaya High Court...

Govt to issue notification on age limits for jobs soon

SHILLONG, FEB 26: Chief Minister Conrad K Sangma on...

Shen yn pynmih jingpynbna ka Sorkar halor u pud rta ioh kam

Shillong, Rymphang 26 : U Myntri Rangbah ka Jylla...

Yn pynlong jingiakhih ki ar seng namar ka jingslem ban pynmih ia ka resol DSC

Nongpoh, Rymphang 26: Ka Ri Bhoi People’s Council (RBPC)...