Shillong, Naitung 01: U President ka Meghalaya Pradesh Congress Committee (MPCC) ma Vincent H Pala hynne ka sngi thohdieng ula ong ba ka Congress kan sei da ki kyrtong kiba khuid na ki jingkynnoh donkti ha ki kam bamsap, ban iakhun ia ka elekshon MLA 2023 ban long ha Jylla.
Haba iakren bad ki nongthoh khubor, u ma Vincent ula ong ba ka Congress ka don jingkyrmen ban lehbha ha kane ka elekshon ban wan namar bun na ki kyrtong ki dei kiba dang thymmai ha ka kam sain pyrthei bad bun ruh na ki, ki dei kibym don ki jingshah kynnoh bamsap, kaba ju iakren bha da ki paidbah ka Jylla Meghalaya.
“Lada phi peit na kane ka liang, dei tang ka Congress kaba don ia ki durkhmat ba dang samla bad ba dang thymmai lem bad kito kiba la shah rem. La ka dei ha Ri-lum Khasi lane ha Ri-lum Garo, nga sngew ba ngi dei tang ma ngi kiban sa pyn ieng ia ki kyrtong kiba biang eh la ka dei ha ka kyrdan pule ne ka jingshimkhia ia ka kam hynrei phi dei ban ailad ia ngi sa 2-3 bnai ban pyndap ia baroh ki seat. Ka thong jong ngi hi ka long ban pynieng kyrtong na baroh 60 tylli ki Constituency” ula ong.
Haba pynpaw baka Congress kala pynkhreh shaid shaid ia ka elekshon ban wan, u ma Vincent ula ong ba satang 20-25% na ki Constituency ki dei kiba dang sah ha ka jingpynkhlain ia ka party bad mynta ka kam ka dang iaid shakhmat.
“Ngim pat shim rai satia ia ki kyrtong hynrei ngi la don ia ki kyrtong kiba la nang iaid sha ki paidbah. Ka jingrai ia ki kyrtong kan sa long hadien bala pynbna ia ka Elekshon bad hadien ba ngi khot thep kyrteng” ula ong.
Kat kum ka jingong jong u, ka Party ka la don lypa ia ki nongpan ticket na jan baroh ki Constituency kiba kwah ban iakhun ia ka elekshon.
U Ma Vincent u pyntip ba ka Congress kan sa pynrung ia ki dkhot thymmai na Laitumkhrah, Nongthymmai bad Ri-Bhoi ha ka 9 tarik Naitung.
Namar ka jingphet noh ki 17 ngut ki MLA na ka party, u ma Vincent ula ong ba watla ki MLA kila phet hynrei ki nongthep vote kim pat phet satia na ka party bad ula pynpaw ia ka jingsngewskhem ba ki nongthep vote kin iai don lang beit bad ka Congress.
Haba kylli mano ban long u Nongialam jong ka Party, u ma Vincent u ban iakhun ialade na Sutnga-Saipung Constituency ula ong “U briew u tyrwa, u Blei u dei uba ai. Ngam tip satia namar ngim pat rai satia”.
Halor ka rai jong ka Sorkar NDA ban pynieng ia ka longkmie riewlum kum ka kyrtong sha ka elekshon President, u ma Pala ula ong ba ka Congress High Command kan sa shim rai halor kane ka kam.
