‘Ka Politics ha Meghalaya ka iapher bad ka Politics ha West Bengal”: Pala
Shillong, Naitung 01: Ka Meghalaya Pradesh Congress Committee (MPCC) kala mih ban sangah ia ka All India Trinamool Congress halor ka jingkynthoh ia ka jingiatreilang ka Congress-BJP ha Meghalaya bad ong ba ka “Politics ha Meghalaya ka iapher bak ly bak bad ka Politics ha West Bengal”.
Kane ka jingkynthoh kala mih na u President ka Meghalaya Pradesh Congress Committee (MPCC) bad MP ka Shillong ma Vincent H Pala hadien ka jingiakynduh ia u Lamphang ka Iingdorbar Thaw Ain ka Jylla Bah Metbah Lyngdoh uba dei ruh u President ka United Democratic Party (UDP).
“Ka rukom pyrkhat ha ka Politics ha West Bengal kam long satia kum hangne ha Meghalaya. Hangne ha Meghalaya, nga ainguh ia u Blei ba ngim ju iohi hangno hangno ruh ba ka Liang Pyrshah lane ka Liang Synshar kin nym iakren iwei ia iwei pat. Nga dang don ka lad ban iakynduh ia u President jong kawei ka party na ka bynta ka jingmyntoi u paidbah” ong u ma Pala haba kynthoh ia ka jingkren u National General Secretary ka AITC u Abhishek Banerjee.
Une u MP ka Shillong ula ong “Katba ka Trinamool Congress lada phi peit ha West Bengal lane ha kiwei kiwei ki jaka, kim don satia ia ka lad ban leh ia kata. Namar kata, ka Politics ha Meghalaya ka iapher bha bad ka Polictics ha West Bengal” haba bynrap ba ki Nongialam ka AITC kila kren kat kum ka politics ha West Bengal bad kam iahap bad hangne ha Jylla.
Haba pynpaw ba ka jingkylli ban iatreilang ka bym shonghok kam mih satia, une u Nongialam ka Congress ula ong “Kumba phi tip, baroh kila mih naka Congress. Kum ka nuksa, ha baroh ki Constituency jong ki 5 ngut ki MLA ba ieh ia ka Congress, ngi la dep kyntiew ia ki kyrtong ban mih bujli. Ta kadaw, ka jingkylli ba ka Congress ka iatreilang bad ka BJP kam mih satia shisien ba kila leit pyniasoh sha ka Sorkar namar ngi la dep sospon ia ki”.
Ka Congress kala sospon ia ki 5 ngut ki MLA kiba kynthup ia I Kong Ampareen Lyngdoh, Mohendro Rapsang, Kimfa S Marbaniang, Mayralborn Syiem bad PT Sawkmie namar ka jingleit kyrshan ia ka Sorkar MDA ba ialam da ka NPP kaba kyrshan da ka BJP.
Haba kylli, u ma Vincent ula ong “Ka jingpan jingpynshai bad jingsospon ka dei kaba la dep leh da ka High Command. Lada kila shah sospon, ka dei kaba la leh da ka hukum jong ka high Command bad lada ki shah beh ruh kan dei da ka hukum jong ka High Command” ula ong.
U Ma Vincent u pyntip baka High Command kala dep shong jingialang dang shen hynrei u ong pat “Ngam pat tip la kila rai ne em ban beh seng ia kine ki MLA namar kane kam hap ha ka bor jong nga”.
