Phah ka KSU iaki Dkhot na Ri-lum Jaintia ban leit ai jingiada
Shillong, Nailur 27 : Ka Khasi Students Union (KSU) ha ka sngi Balang, kala dawa ia ka Sorkar Jylla ba kan phah bun ia ki Pulit ban ai jingiada ia ki paidbah khamtam ki nongrep Khasi-Pnar ka shnong Lapangap, West Jaintia Hills namar ka jing iai bteng ka jinghiar thma jong ki paid Karbi na Assam.
Ha ka kyrwoh, u General Secretary ka KSU Donald V Thabah ula ong “Ngi kyntu ia ka Sorkar Meghalaya ba kan pynkhlain ia ki bor ai jingiada ia ki paidbah khamtam ia ki nongrep ha kum kane ka por kheit marrep”.
Kane kala mih tang shisngi hadien ba ki paid Karbi kila hiar thma ia ki nongrep Khasi-Pnar da ki jri siat sim bad ki khnam ki ryntieh katba ki dang treikam hala ki jong ki pynthor.
U samla Donald u pyntip ba ki dkhot ka KSU West Jaintia Hills kila hiar kyrkieh sha Lapangap ban ai ka jingkyrshan ba pura ia ki paid Khasi-Pnar ka thain.
Ula ong ba naduh kulong kumah, ka dei ka rukom jong ki Khasi-Pnar ban rep ban riang sha ki jaka ba don shabar ka Shnong. Hynrei, ki paid Karbi kila shim kabu ia kane da kaba kam ba ki lyngkha rep jong ki Khasi-Pnar ki hap sha u pud ka Assam. Ula ong ba kum kine ki jingjia kila jia beit tang ha ka por ot kba.
“Namar kata, ngin ai ka jingkyrshan ba pura ia ki paid Khasi-Pnar ka Lapangap bad kiwei ki shnong kiba don ha khappud ka Assam. Ngin pynthikna ba wat tang shi inchi ka jaka jong ngi kan ym leit sha Assam” ula kular.
Une u Nongialam ka KSU ula kyntu ia ki paid Karbi bad ki borkhmih ka Sorkar Assam ba kin kiar na ka jingpyndik ia ki paid nongrep Khasi-Pnar. “Ka KSU kam kwah ban mih ka jingiakajia hapdeng ki ar jaidbynriew hynrei kam lah ruh ban shu long ka nongpeitkai ia ki kam thombor ia ki briew lajong na ka por sha ka por” ula ong.
“ Ka Lapangap, Mukroh, Khanduli, Langpih, Sabuda, Umwang, Moolber, Moojem, Psiar, Khatkasla bad kiwei ki Shnong Khasi ki dang hap hapoh u pud u sam la Meghalaya bad ka KAAC lem bad ka Sorkar Assam kim lah ban shu kam trai ia ki” ong une u Nongialam ka KSU.
