Shillong, Nailur 27: U Chief Executive Member ka KHADC u Bah Pyniaid Sing Syiem ula kynnoh, ba ka seng saiñ pyrthei Voice of the Peoples Party (VPP) ka dei ka dur bula jong ka All India Trinamool Congress (AITC) ha rilum Khasi.
“Ka jingrem ka jong ngi ha ka elekshon ka long kaba sngewkyndit bad haba ngi la wad ia ka jingshisha, ba pleng ha Mawryngkneng Constituency ka jingjop ka VPP ka dei na ka jingiarap ka TMC” ong u Bah Pyniaid.
“Ka jingiarap ka TMC ka long da kaba phah lut ia baroh ki briew jong ka party ba kin kyrshan noh ia ka VPP bad ka ba-ar ka dei namar ka jingshongshit ki briew iaka jingrwai bad haba ngi peit sha kiwei ki constituency, ka jingjop jongka TMC kadei na ka jingiarap jong ka VPP” ula bynrap.
U Bah Pyniaid ula ong, namar ka VPP kam shym don satia ha Ri-lum Garo, ka TMC kam shym la lah thaw pyrthei ban iakhun pyrshah ia ka NPP.
“Lada peit ia kine ki jingjia baroh, ki pynsakhi ba kine kiei kiei baroh, ba pleng ka VPP kam dei ka party ka ba napoh ri Khasi bad u Prah ruh ym dei u Prah Khasi, lah ban ong ba udei u Prah West Bengal” ula ong.
U Bah Pyniaid uba shah rem ha ka elekshon MLA 2023 ha u kyrtong ka VPP ula ong “Kane kadei kaba ngi la lap hadien ba ngi la bishar bha iaka jinglong jingman ha kaba iadei bad ka elekshon kaba dang shu dep. Ka dur bula jongka TMC ha ri Khasi kadei ka VPP”.
Ha kaba iadei bad ka elekshon MDC ka ban long ha u snem ban wan, u Bah Pyniaid ula ong, “Ba lada iakhun ia ka elekshon la shem snem, ngi lah ithuh ia ki nongiakhun pyrshah ia ngi bad kan ym don jingartatien shuh bad lada dei u Prah Khasi lehse ka lah ban don ka jingiakhun hynrei lada dei u Prah West Bengal kin ym shan slem bad ka NPP kan dang wanphai biang ha ka bor”.
Ula ong, ba ki briew kiba wan iakynduh ia u mynta kiba bun ki dei kiba bud VPP namar ba kila sngewthuh ba kam poi shaei shaei kata ka jingbud ia ka VPP.
“Dang tang 6 bnai, phi tip, kiba bun kiba wan iakynduh ia ngi ki dei kiba kyrshan iaka VPP, kiba bud Prah…kila sngewthuh ba kam poi shaei shaei kata ka jing vote ia ka VPP. Lada phi kren sa kat kaba phi kren ruh, ym dei tang ka VPP kaba ieid jaidbynriew, ngi ruh ba don ha ka NPP ngi ieid ia ka jaidbynriew bad ngi ieid ia ka jaidbynriew da ka kam kaba ngi trei ym da kaba shu hylla ha surok ne pynlong jingialang hangne hangtai ban shu ialam bakla ia ki briew” ong u MDC ka NPP.
