Shillong, Nailur 27: U Myntri ka tnat Animal Husbandry bah A.L Hek ula iathuh ka tnat kam pat ioh tia ia kano kano ka kaiphod halor ka jingiap ki sniang hapoh ka shnong Saiden Ri-bhoi district.
Lah ban kdew ba haka 26 tarik mynta u bnai la saphriang ha ki lad pathai khubor ba kala don ka jingiap khlam haduh 3 tylli ki sniang hapoh ka shnong Saiden Ri-bhoi district. Shuwa kane kala don ka jingiap haduh 10 tylli hapoh kawei ka jaka ri sniang jong ka Nongku Chaphrang Multipurpose Cooperative Society kaba don ha Saiden.
Haba pyrshang wad iaka jingshisha u Myntri ula ong ba ula dep ban iakren bad u Director ka tnat Animal Husbandry bad Secretary ka Veterinary hynrei wat ki ophisar ka tnat ruh kim pat pyntip eiei halor kata ka khubor.
Haba kylli hato ka tnat kan phah tohkit ne em halor ka khubor iap khlam ki sniang, u bah Hek ula ong “Lada kala don shisha kum kata, ka tnat kan hap phah tohkit hynrei haduh mynta ka tnat kam pat ioh pdiang jingtip halor kata ka khubor iap khlam”.
