Shillong, Jymmang 15: Ka Jaintia Students’ Union (JSU) Southern Border Zone East Jaintia Hills ka la phah tuklar ha u Myntri ka tnat bor ding u AT Mondal ban pynpoi bording elektrik mardor hapoh ka thain Dong Mihsngi jong ka shnong Bataw.
Ha ka dorkhas bala aiti sha u Myntri ka tnat Bording, ka JSU ka la ong ba haduh mynta, ka Dong Mihsngi kam pat ioh ia ka bording elektrik, bad kane ka la ktah jur ia ki nong shong shnong khamtam ha ka por janmiet bad mynmiet.
Ka JSU kala ong ba khlem ka bording, ki samla pule ki shem jingeh ban pule kot haka por miet bad ruh ba ki longiing ki shem jingeh ban pynkhreh ia ki jingbam bad ban pyndep ia ki kam ki jam ba man ka sngi.
“Ka jingbym don bording ka khanglad ïa ki kam kamai jong ki, namar kim lah ban pynïaid ïa ki kam kiba donkam ïa ka bording. Ka jingbym don bording ban pynshai iaki surok ka wanrah ka jingbym sngewshngain iaki nong shong shnong haka por miet” la ong ka dorkhas.
Ka JSU ka la pytip ba naka liang u Myntri u la pynthikna ban pynbeit ia kane ka jingeh ha ki bnai ban wan lyngba ka skhim RDSS (Revamped Distribution Sector Scheme).
