Shillong, Nohprah 2: Ka Hynniewtrep Integrated Territorial Organisation (HITO) kala dawa ia ka Ministry of Environment, Forest and Climate Change (MoEFCC) ba ka dei ban pynsangeh bad ban pynduh noh ia baroh ki kam kiba iadei bad ka jingthmu jongka Shree Cement Limited ban seng karkhana dewbilat hapoh ka shnong Daistong, East Jaintia Hills, Meghalaya.
U President ka HITO u Bah Donbok Dkhar ula ong, ba ka jingthmu jong kane ka projek kadei ka jingma kaba la ap lypa ia ka thain kaba kynthup ia ki jaka rep, tyllong um bad ka rukom im tynrai jong ki paitbah.
Ka seng kala pynpaw ia ka jingsngewkhia halor ka jingpynjaboh ia ka lyer, ka jingtan ia ka um bad ka jingpynkylla shirta syndon ia ki jaka rep sha ka jaka jong ka karkhana.
“Ngi iengskhem ba kane ka projek kam long kaba iahap satia bad ka jinglong jingman ha ka thain, ka jinglong ki jaka rep jaka riang bad ka jinglong jingman ha kaba iadei bad ka rukom im tynrai kaba naduh mynshwa jong ki paid riewlum” la ong u Bah Dkhar.
Ka HITO kala dawa ba dei ban pynduh noh ia ka Environmental Clearance bad ban iada ia ki jaka rep bad ia ka jinglong jingman jong ka sawdong sawkun jong ka shnong Daistong bad ki jaka kiba marjan.
Ula banjur ba kane ka projek kadei ruh kaba don hajan bha bad ki shnong ki thaw kaba tang kumba 0.82-1.4 km na ka shnong Daistong ka bym long kaba iahap satia bad ka jinglong jingman ki jaka rep jaka riang.
Ka seng akla buh jingkylli ruh ia ka rukom treikam jongka Single Window Agency (SWA), hapoh ka jingialam u Myntri Rangbah ka Jylla Meghalaya, uba la ai jingbit ia kane ka projek khlem da shimkhia ia ka jinglong jingman ka mariang bad ia ka kamai kajih jong ki paitbah.
“Ngi ngim pyrshah ia ki kam kiba iadei bad ka roi ka par. Ngi pyrshah ia ka jingpynjot bad jingpynjulor kiba wan ha ka dur kaba rieh lyngba ka kam pynroi” la ong u Bah Dkhar bad ka byrngem ba kano kano ka jingpyrshang ban pyniaid shakhmat ia kane ka projek kan dei kaban mad da ka jingiakhih kaba la pynkhreh bha, kaba shongaiñ bad ka jingieng skhem jong u paid ba bun balang.
 kala dawa ia ka Ministry of Environment, Forest and Climate Change (MoEFCC) ba ka dei ban pynsangeh bad ban pynduh noh ia baroh ki kam kiba iadei bad ka jingthmu jongka Shree Cement Limited ban seng karkhana dewbilat hapoh ka shnong Daistong, East Jaintia Hills, Meghalaya.){kind=link}