Shillong Nohprah 02: Ka Sorkar Jylla kala shim ia ka rai ban thung ia ka Monitoring Committee-ka ban khmih ia ka jinglong jingman bad ka jingshah pynjulor ki jaka rep na ka jingshna ia ka surok Shillong-Dawki, khnang ban ioh siew ia ka bai lutksan sha ki trai jaka bad ki nongrep.
U Bah Prestone ula pyntip ia kane ha ka jingleit jurip ia ka jingshna ia ka surok hynne ka sngi Nyngkong ha ryngkat ki Heh Ophisar ka PWD, NHIDCL bad kiwei kiwei.
“Nga la bthah ia ka bor pyniaid district bad ia ka SDO Civil ban leh ia ka sorjamin ryngkat bad ka jingkhmih bniah ia ka jinglong jingman ba iadei bad ka jingjulor ki marrep kaba ki paidbah ki thung, kaba nga la iohi myntan da la ki jong ki khmat” ong u Bah Prestone haba kynthoh ia ka jingkam ka Kompani ba pyntrei ia ka surok ba ki jingjulor ki jaka rep ka dei namar ka jingtwa khyndew.
“Ha ka jingpeit jong nga, ngam i dei satia na ka jingtwa khyndew…teng teng, phi lah ban sngewthuh hi ba ki kompani bad ki contractor ki kwah ban pyndep kloi ia ka kam bad kham iohnong…lehse dei na kane ka daw ba jia kumto” ula bynrap.
U Bah Prestone ula iathuh “Nga la bthah ia ka SDO bad BDO ba kin peit bniah ia kane ka bynta bad ia ka jingduhnong ki nongrep. Ngi la maham ruh mynne ba kim bit shuh ban pyntuid ia ka khyndew ne ki maw sha ki jaka rep”.
“Kine ki Ophisar kin sa leit sorjamin bad lum jingkhein ia ka jingduhnong ki trai jaka bad ki nongrep. Nga la iohi ia ka jingduh jong ki marrep kum u kwai bad tynpew bad kiwei kiwei” ula ong.
Halor ka jingud ki trai jaka ba kim pat ioh ia ka pisa ba die jaka, u Bah Prestone ula ong “Ki don ki trai jaka kiba pynpaw ba kim pat ioh ia ka bai jaka bad nga la iakren ia u Deputy Commissioner ka West Jaintia Hills uba la iathuh ba ula dep siew lut ia ka bai jaka bad pynpaw ia ka jinglyngngoh ba ki dang don kiba dang ujor”.
“U DC un s alum ia ka jingialang bad ki trai jaka ba ujor bad nga la bthah ba u dei ban khmih bniah bha kat kum ka map jong ki jaka ba pyniaid lynti ia ka surok” ula ong.
