Nongstoin, Nailur 27 : Ka seng FKJGP-Rambrai Circle kala dawa ia ka Sorkar Jylla ba kan pyntreikam pura noh ia ka Rambrai C&RD Block bad ban thung mardor ia u Block Development Officer (BDO) lem bad ki Nongtrei ba pura, ki ban ai ka jingshakri ia ka thain.
Kane ka jingdawa kala mih hadien ba ka Seng kala lap lyngba ka RTI ba ka Sorkar kam pat dep thung satia ia u BDO ne ki Nongtrei ha kane ka Block, kaba la jan dap shisnem naduh ba plie paidbah ia ka da u Myntri Rangbah ka Jylla.
Haba iakren bad ki lad pathai khubor, u President ka FKJGP Rambrai Circle Bah Jistarland Lyngkhoi ula ong ba haduh mynta kane ka Block kam pat lah treikam satia naduh ba plie ia ka.
U iathuh ba kat kum ka RTI, ka Sorkar kala pynbna ba kala dep thung ia u BDO u ban peit shipor ia ka jingtreikam jong ka Block hynrei une u BDO ruh um pat don satia haduh mynta.
U ong, ba ka RTI ka iathuh b aka Sorkar kala pyllait ia ka jingpynbna laitkam ha u bnai Nailar bala dep hynrei kane ruh ka dang shu sahkut bad ki kam ki jam baroh ki dei kiba dang hap ban pyndep na Nongstoin C&RD Block.
Na ka RTI la shem ba kane ka Block ka don tang ki nongtrei kiba la shu thung contract, kiba khmih tang ia ki kam jong ka MGNREGA bad ka PMAY hynrei kine ki Nongtrei ruh kim pat shym la treikam satia ha Rambrai.
U Bah Jistarland ula kyntu ia ka Sorkar ba kam dei ban leh politics ia kane ka kam hynrei ban khmih bad pyrkhat lem ia ka khia ka shon bad ka jingeh u paidbah da kaba pynlongdoh longsnam pura noh ia kane ka Block.
