Shillong, Sep 27: Ka Department of Agriculture & Farmers’ Welfare hynne ka sngi Balang kala pynlong ia ka Workshop & Exhibition of the International Year of Millets ha or ka phang ‘Millets for Nutritional Security’ ha All Saints Hall, Shillong.
Ka Secretary jongka tnad Agriculture & Farmers Welfare ka Kong Isawanda Laloo, kum ka kongsan kala ong ba hadien ka ‘Green Revolution’ ki nongrep kila phaikhmat thikna bha sha u khaw bad u kew, katba u Krai uba long u jingthung uba kongsan bad ba donkam ban shimkhia bha, ula shah leh klet noh.
Kala kyntu ia ki nongrep ba ki dei ban pule bad ban wad ia ki jingkordor bad ban pynpawnam ia ka jingrep Krai bad ka sorkar kala shim ia ki sienjam ban kynthup ia u Krai ha ka ‘mission crop’ bad ban pynshlur ia ki nongsengkam lajong bad ki nongrep ban kyntiew bad pynbun ia ka jingrep krai ka ban iarap shibun ban kyntiew iaka jingim bad ia ka ioh ka kot jong ki.
Ki nongrep ia u Krai na kylleng ki bynta jong ka jylla kila shah pynkup burom ha ka Kongsan ha katei ka jingialang bad hadien kane ka Kong Isawanda ryngkat bad ki heh ki haiñ kila leit ruh ban jurip ia ki dukan kiba la pyninam ia ki jingpynmih kiba byn rukom na u Krai.
